இந்தியாவில் டேட்டா சென்டர் துறை அசுர வேகத்தில் வளர்ந்து வருகிறது. 2030-க்குள் சுமார் 4.33 லட்சம் புதிய வேலைவாய்ப்புகள் உருவாகும் என எதிர்பார்க்கப்படுகிறது. ஐடி துறையைத் தாண்டி இன்ஜினியரிங் மற்றும் ஏஐ (AI) கட்டமைப்பு சார்ந்த பணிகளுக்கு மவுசு கூடியுள்ளது.
இந்தியாவின் டேட்டா சென்டர் திறன் வேகமாக அதிகரித்து வருவது நாட்டின் வேலைவாய்ப்பு சந்தையை மாற்றியமைத்து வருகிறது. தற்போது 4.33 லட்சம் புதிய வேலைவாய்ப்புகளை உருவாக்கும் இலக்குடன் இத்துறை களமிறங்கியுள்ளது. ஐடி துறையின் ஒரு அங்கமாக மட்டுமே பார்க்கப்பட்ட டேட்டா சென்டர், இன்று கட்டுமானம், மின்சார விநியோகம் மற்றும் சிறப்பு வசதி மேலாண்மை போன்ற துறைகளில் பெரிய வேலைவாய்ப்பு இயந்திரமாக உருவெடுத்துள்ளது.
முதலீட்டு மழையும் ஏஐ புரட்சியும்
ஏஐ (AI) கட்டமைப்பிற்குத் தேவையான திரவ குளிரூட்டல் (Liquid cooling) மற்றும் நவீன MLOps தொழில்நுட்பம் சார்ந்த வல்லுநர்களுக்குத் தேவை அதிகரித்துள்ளது. Adani மற்றும் Reliance போன்ற நிறுவனங்கள் உட்பட பல முன்னணி பிளேயர்கள் $100 பில்லியன் டாலருக்கும் அதிகமான முதலீடுகளைத் திரட்டியுள்ளனர். 2026-ன் பாதியில் 1.6 GW ஆக இருக்கும் திறன், 2030-க்குள் 6 GW முதல் 9 GW வரை உயரும் என கணிக்கப்பட்டுள்ளது.
சந்திக்கும் சவால்கள்
வளர்ச்சி ஒருபுறம் இருந்தாலும், திட்டங்களைச் செயல்படுத்துவதில் பெரும் தடைகள் உள்ளன. ஒருங்கிணைந்த தேசியக் கொள்கை இல்லாததால், ஒரு புராஜெக்ட் தொடங்க 40 முதல் 50 அனுமதி சான்றிதழ்கள் தேவைப்படுகின்றன. இது கட்டுமான காலத்தை 18 முதல் 30 மாதங்கள் வரை தாமதப்படுத்துகிறது. முதலீட்டாளர்கள் கவனிக்க வேண்டிய மிக முக்கியமான விஷயம், நிறுவனங்கள் இந்த சிக்கல்களைத் தாண்டி திட்டங்களை எப்படி சரியான நேரத்தில் முடிக்கின்றன என்பதுதான்.
மேலும், விசாகப்பட்டினம் போன்ற பகுதிகளில் தண்ணீர் பயன்பாடு மற்றும் சுற்றுப்புற சூழல் பாதிப்புகள் குறித்த கேள்விகள் எழுந்துள்ளன. Tier-2 மற்றும் Tier-3 நகரங்களுக்குத் தொழில் விரிவடையும் போது, மின்சார கட்டமைப்பு மற்றும் சுற்றுச்சூழல் பாதிப்புகளைச் சரியாகக் கையாள்வதே இந்த துறையின் எதிர்கால வெற்றிக்கு முக்கியமானது.