இந்தியாவின் ஸ்டார்ட்-அப் நிறுவனங்கள் ஸ்மார்ட்போன் திரைகளில் மட்டும் முடங்கிவிடாமல், நேரடியாக பிசிக்கல் ஹார்டுவேர் (Physical Hardware) சாதனங்களில் செயற்கை நுண்ணறிவை (AI) புகுத்தி வருகின்றன.
இந்திய ஸ்டார்ட்-அப் உலகம் இப்போது ஒரு புதிய மைல்கல்லை நோக்கி நகர்கிறது. ஸ்மார்ட்போன் ஆப்-களுக்கு அப்பால், அன்றாடப் பொருட்கள் மற்றும் ஹார்டுவேர் சாதனங்களிலேயே AI-ஐ ஒருங்கிணைக்கும் 'Ambient Intelligence' என்ற கான்செப்ட்டை இவை கையில் எடுத்துள்ளன.
சந்தையில் முன்னணியில் இருப்பவை
பெங்களூருவைச் சேர்ந்த Kubo Care நிறுவனம், முதியோர் பராமரிப்பிற்காக ரேடார் தொழில்நுட்பத்தை உருவாக்கியுள்ளது. இது ஸ்மார்ட்போன் ஆப் அல்லது அணியக்கூடிய சாதனங்கள் (Wearables) தேவையில்லாமல், வீட்டிலேயே முதியவர்களின் அசைவுகளைக் கண்காணித்து, கீழே விழுந்தால் உடனடியாக எச்சரிக்கை செய்யும் வகையில் செயல்படுகிறது. இது இந்தியா, ஜப்பான் மற்றும் அமெரிக்காவில் ஏற்கனவே பயன்பாட்டில் உள்ளது.
மற்றொரு நிறுவனமான NeoSapien, 'Neo 1' என்ற AI அணியக்கூடிய சாதனத்தை அறிமுகப்படுத்தியுள்ளது. இது மீட்டிங் குறிப்புகளை எடுப்பது மற்றும் உரையாடல்களை மொழிபெயர்ப்பது போன்ற வேலைகளைச் செய்கிறது. இதற்காக அந்நிறுவனம் $2 மில்லியன் சீட் ஃபண்டிங் திரட்டியுள்ளது என்பது குறிப்பிடத்தக்கது.
எதிர்கொள்ளும் சவால்கள்
- சப்ளை செயின்: இந்தியாவில் உயர்ரக மின்னணு பாகங்களை பெறுவதிலும், தரமான டெஸ்டிங் கட்டமைப்பை உருவாக்குவதிலும் இன்னும் சிக்கல்கள் உள்ளன.
- நிலைத்தன்மை (Sustainability): இந்த சாதனங்கள் கிளவுட் சேவையை நம்பி இருப்பதால், நிறுவனங்களின் பிசினஸ் மாடல் மாறினால், இந்த சாதனங்கள் வெறும் பயனற்ற பிளாஸ்டிக் பொருட்களாக மாறிவிடும் அபாயம் உள்ளது.
- தனியுரிமை (Privacy): எப்போதும் இயங்கிக்கொண்டிருக்கும் AI சாதனங்கள், தனிப்பட்ட இல்லங்களுக்குள் ஒரு ' permanent listener'-ஆக செயல்படுவது பயனர் நம்பிக்கையில் பெரும் கேள்வியை எழுப்புகிறது.
மென்பொருளைப் போல அல்லாமல், ஹார்டுவேர் தயாரிப்புகள் அதிக கால அவகாசமும், துல்லியமான தரக்கட்டுப்பாடும் தேவைப்படுபவை. இந்தத் தடைகளைத் தாண்டி, பெரும் உற்பத்தியில் (Mass Production) இந்த நிறுவனங்கள் எப்படி வெற்றி பெறப்போகின்றன என்பதை முதலீட்டாளர்கள் உற்றுநோக்கி வருகின்றனர்.