தன்னுடைய பிளாட்டினம் ஜூபிலியை முன்னிட்டு, IIT Kharagpur அதிநவீன AI அடிப்படையிலான லேர்னிங் அசிஸ்டண்ட் மற்றும் GATE, JAM தேர்வுகளுக்கான இலவச போர்ட்டலை அறிமுகப்படுத்தியுள்ளது.
இந்தியாவின் முன்னணி கல்வி நிறுவனமான IIT Kharagpur, தனது பிளாட்டினம் ஜூபிலி விழாவில் இரண்டு முக்கியமான டிஜிட்டல் திட்டங்களை அறிவித்துள்ளது. கல்வித்துறை அமைச்சர் சுகந்த மஜும்தார் இந்த புதிய AI வசதிகளைத் தொடங்கி வைத்தார்.
எப்படி வேலை செய்யும்?
தேசிய டிஜிட்டல் நூலகமான NDLI-யுடன் இணைந்து, Fermi AI உதவியுடன் இந்த 'NDLI-FERMI AI Tutor' உருவாக்கப்பட்டுள்ளது. வழக்கமான AI கருவிகள் போல விடையை மட்டும் தராமல், மாணவர்களின் சிந்தனையைத் தூண்டும் வகையில் ஹிண்ட்ஸ் மற்றும் கருத்துகளை வழங்கி, பாடங்களை ஆழமாகப் புரிய வைக்க இது வடிவமைக்கப்பட்டுள்ளது. இயற்பியல், வேதியியல், கணிதம் மற்றும் உயிரியல் ஆகிய பாடங்களுக்கு இதில் 'Scan & Ask' வசதி உள்ளது.
எடெக் நிறுவனங்களுக்கு நெருக்கடி!
GATE மற்றும் JAM போன்ற கடினமான நுழைவுத் தேர்வுகளுக்குத் தயாராகும் மாணவர்களுக்கு, இது ஒரு பெரிய வரப்பிரசாதம். இதுவரை பல மாணவர்கள் தனியார் கோச்சிங் சென்டர்களை நம்பி லட்சக்கணக்கில் செலவு செய்து வந்த நிலையில், IIT-யின் இந்த இலவச சேவை எடெக் மார்க்கெட்டில் பெரிய மாற்றத்தை ஏற்படுத்தலாம். கட்டணக் கல்வி வழங்கும் நிறுவனங்கள் இனி தங்கள் விலைக் கொள்கையை மறுபரிசீலனை செய்ய வேண்டிய கட்டாயத்திற்குத் தள்ளப்படலாம்.
தற்போது NDLI தளத்தில் 13 கோடிக்கும் அதிகமான வளங்கள் உள்ளன மற்றும் 1 கோடிக்கும் மேற்பட்ட மாணவர்கள் பதிவு செய்துள்ளனர் என்பது குறிப்பிடத்தக்கது.