இந்தியாவில் தயாரிக்கப்பட்ட 5G ஆண்டெனாக்களை ஐரோப்பா மற்றும் பிற உலக நாடுகளுக்கு ஏற்றுமதி செய்யத் தொடங்கியுள்ளது Ericsson. இதன் மூலம் இந்தியாவின் உற்பத்தித் தளம் சர்வதேச அளவில் முக்கிய மையமாக உருவெடுத்துள்ளது.
ஹரியானாவின் மானேசாரில் உள்ள உற்பத்தி மையத்தில், VVDN Technologies நிறுவனத்துடன் இணைந்து Ericsson இந்த ஆண்டெனாக்களைத் தயாரித்து வருகிறது. 2025-ம் ஆண்டின் மத்தியில் இருந்து, இங்கு 15,000-க்கும் மேற்பட்ட ஆண்டெனாக்களும், 2.5 கோடி நெட்வொர்க் உதிரிபாகங்களும் தயாரிக்கப்பட்டுள்ளன. தற்போது ஆண்டெனாக்களின் உள்ளூர் உற்பத்தி அளவு 50%-க்கும் அதிகமாக உயர்ந்துள்ளது.
இந்தியாவின் புதிய பங்கு
இந்தியாவில் உள்ள 22,000 பணியாளர்களில், 2,200 பேர் ஆராய்ச்சி மற்றும் மேம்பாட்டு (R&D) பிரிவில் பணியாற்றி வருகின்றனர். இவர்கள் AI-க்கு ஏற்ற நெட்வொர்க் வசதிகள், சிப் டிசைன் மற்றும் 6G தொழில்நுட்பத்திற்கான பணிகளில் தீவிரமாக ஈடுபட்டுள்ளனர்.
முதலீட்டாளர்கள் கவனத்திற்கு
டெலிகாம் உபகரணத் துறை கடும் சவால்களைச் சந்தித்து வருகிறது. அதிகப்படியான R&D செலவுகள் மற்றும் லாப வரம்புகளை (Profit Margins) சமநிலையில் வைத்திருப்பது நிறுவனங்களுக்குப் பெரும் சவாலாக உள்ளது. உலகளாவிய தேவை மாற்றம், உதிரிபாகங்களின் விலை உயர்வு மற்றும் கரன்சி மாற்றங்கள் நிறுவனத்தின் லாபத்தைப் பாதிக்கலாம்.
அடுத்து வரும் காலங்களில், இந்திய அரசின் PLI (Production Linked Incentive) திட்டத்தை Ericsson எவ்வாறு பயன்படுத்தப் போகிறது என்பதே முக்கிய எதிர்பார்ப்பாக உள்ளது. புதிய ஏற்றுமதி வியூகம் நிறுவனத்தின் லாப வரம்புகளை உறுதிப்படுத்துமா என்பதை முதலீட்டாளர்கள் தொடர்ந்து கண்காணிக்க வேண்டும்.