Bosch Software மற்றும் Digital Solutions நிறுவனம், Dassault Systèmes உடன் கைகோர்த்துள்ளது. இந்திய தொழிற்சாலைகளில் AI மற்றும் விர்ச்சுவல் ட்வின் (Virtual Twin) தொழில்நுட்பத்தை புகுத்தி, உற்பத்தித் திறனை அதிகரிக்கவும், downtime-ஐ குறைக்கவும் இந்த கூட்டணி திட்டமிட்டுள்ளது.
இந்திய உற்பத்தி துறையை அடுத்த கட்டத்திற்கு கொண்டு செல்ல, Bosch மற்றும் Dassault Systèmes ஆகிய நிறுவனங்கள் இணைந்துள்ளன. இந்த கூட்டணியானது Dassault Systèmes-ன் 3DEXPERIENCE தளம் மற்றும் DELMIA Apriso மென்பொருளை, Bosch-ன் Cognitive Factory கருவிகளுடன் இணைக்கிறது. இதன் மூலம் தயாரிப்பு பொறியியல் (Product Engineering) மற்றும் தொழிற்சாலை தளம் (Shop-floor operations) ஆகியவற்றுக்கு இடையே ஒரு டிஜிட்டல் பிணைப்பு உருவாகும்.
EV துறையில் தொடக்கம்
இந்த தொழில்நுட்பத்தின் முதல் கட்டமாக, இந்தியாவில் உள்ள ஒரு முன்னணி மின்சார வாகன (EV) உற்பத்தி ஆலையில் இது அமல்படுத்தப்பட்டு வருகிறது. விர்ச்சுவல் ட்வின் தொழில்நுட்பம் மூலம் தொழிற்சாலையின் இயற்பியல் அமைப்புகளை டிஜிட்டல் முறையில் பிரதிபலித்து, மின்சார பயன்பாட்டை மேம்படுத்தவும், தரத்தை உறுதி செய்யவும் முடியும்.
முதலீட்டாளர்கள் கவனத்திற்கு
Bosch India நிறுவனம் ₹40,000 கோடிக்கும் அதிகமான ஆண்டு வருவாயை ஈட்டி வலுவான நிதி நிலையில் உள்ளது. தற்போதைய நிலையில், பாரம்பரிய வாகன உதிரிபாகங்கள் தயாரிக்கும் நிறுவனமாக இருந்த Bosch, இப்போது அதிக மதிப்புள்ள டிஜிட்டல் கன்சல்டிங் மற்றும் சிஸ்டம் இன்டகிரேஷன் சேவைகளை வழங்கும் நிறுவனமாக உருவெடுக்க முயல்கிறது.
இந்த மாற்றமானது நீண்ட கால அடிப்படையில் லாப வரம்பை (Margins) உயர்த்தக்கூடும் என்று எதிர்பார்க்கப்பட்டாலும், பெரிய அளவிலான தொழிற்சாலைகளில் இந்த தொழில்நுட்பத்தை செயல்படுத்துவதில் உள்ள சவால்கள் மற்றும் EV சந்தையின் தற்போதைய நிதிச் சுமை ஆகியவற்றை முதலீட்டாளர்கள் கவனிக்க வேண்டியது அவசியம். மென்பொருள் சார்ந்த இந்த புதிய வருவாய் ஆதாரம், நிறுவனத்தின் லாபத்தில் எந்தளவு பங்களிக்கிறது என்பது வரும் காலாண்டுகளில் தெரியவரும்.