Polymarket மற்றும் Kalshi போன்ற பிளாட்ஃபார்ம்கள் இப்போது அமெரிக்கப் பங்குகளின் விலையை வைத்து சூதாட அனுமதிக்கின்றன. முறையான கட்டுப்பாடுகள் இல்லாததால், இதில் முதலீடு செய்வது பெரும் ரிஸ்க் என எச்சரிக்கப்படுகிறது.
அமெரிக்காவில் தற்போது 'Prediction Markets' என்ற புதிய வகை சூதாட்ட தளங்கள் பெரும் வரவேற்பைப் பெற்று வருகின்றன. தேர்தல்கள் மற்றும் உலக அரசியல் நிகழ்வுகள் மீது பந்தயம் கட்டப்பட்ட நிலையில், இப்போது Nvidia, Tesla, Apple மற்றும் Alphabet போன்ற முன்னணி நிறுவனங்களின் பங்கு விலை மாற்றங்கள் மீதும் பந்தயம் கட்டும் வசதி வந்துள்ளது.
இது எப்படி இயங்குகிறது?
வழக்கமான பங்குச் சந்தை (Stock Exchange) போல இல்லாமல், இது 'Binary Betting' மாடலில் இயங்குகிறது. ஒரு குறிப்பிட்ட காலத்தில் பங்கு விலை ஏறுமா அல்லது இறங்குமா என்று பந்தயம் கட்டுவதே இதன் வேலை. வெற்றிகரமாக கணித்தால் லாபம், இல்லையெனில் போட்ட முழுப் பணமும் காலி. ஓராண்டுக்கும் குறைவான காலத்தில் இந்தச் சந்தையில் $220 மில்லியன் மதிப்பிலான வர்த்தகம் நடந்துள்ளது.
முதலீட்டாளர்களுக்கு ஏன் ஆபத்து?
- கட்டுப்பாடுகள் இல்லை: New York Stock Exchange அல்லது Nasdaq போலன்றி, இங்கு 'Insider Trading' தடுப்புச் சட்டங்களோ அல்லது நிறுவனங்களின் நிதி நிலை அறிக்கைகளை வெளிப்படையாக அறிவிக்கும் கட்டாயமோ இல்லை.
- பாதுகாப்பு குறைபாடு: இது ஒரு ஒழுங்குமுறை இல்லாத (Regulatory gray area) பகுதி. இதனால் முதலீட்டாளர்கள் ஏமாற்றப்பட அதிக வாய்ப்பு உள்ளது.
- சட்டப் போராட்டம்: அமெரிக்காவின் Securities and Exchange Commission (SEC) மற்றும் Commodity Futures Trading Commission (CFTC) ஆகிய அமைப்புகளுக்கு இடையே, இந்த தளங்களை யார் கட்டுப்படுத்துவது என்ற மோதல் நீடிக்கிறது.
முதலீட்டாளர்கள் கவனத்திற்கு: இது முதலீடு அல்ல, வெறும் பந்தயம் மட்டுமே. முறையான சட்டப் பாதுகாப்பு இல்லாததால், இதில் ஈடுபடும்போது உஷாராக இருப்பது அவசியம்.