வரும் டிசம்பர் 6, 2026 முதல் Nasdaq மற்றும் NYSE Arca போன்ற அமெரிக்க எக்ஸ்சேஞ்சுகள் இரவு நேர வர்த்தகத்தை (Overnight Trading) அறிமுகப்படுத்துகின்றன. இரவு 9 மணி முதல் அதிகாலை 4 மணி வரை இனி அமெரிக்க பங்குகளில் வர்த்தகம் செய்யலாம்.
அமெரிக்க பங்குச்சந்தையின் வர்த்தக முறையில் மிகப்பெரிய மாற்றம் வரவுள்ளது. டிசம்பர் 6, 2026 முதல் Nasdaq, NYSE Arca, 24X National Exchange மற்றும் Cboe EDGX ஆகிய தளங்கள் இரவு நேர வர்த்தக அமர்வுகளைத் தொடங்குகின்றன. இந்த புதிய நடைமுறை ஞாயிறு முதல் வியாழன் வரை, இரவு 9:00 மணி முதல் அதிகாலை 4:00 மணி (ET) வரை செயல்படும். கணினி அமைப்புகளை தயார் செய்ய தினமும் இரவு 8:00 முதல் 9:00 மணி வரை ஒரு மணிநேர இடைவெளி இருக்கும்.
ஏன் இந்த மாற்றம்?
சர்வதேச முதலீட்டாளர்களின் நீண்டகால கோரிக்கையை ஏற்று, கிரிப்டோ சந்தையைப் போல 24/7 வர்த்தக சூழலை உருவாக்குவதே இதன் முக்கிய நோக்கம். இது சர்வதேச முதலீட்டாளர்களுக்கு கூடுதல் நெகிழ்வுத்தன்மையை வழங்கும் என்றாலும், பகல் நேர வர்த்தகத்திலிருந்து இது பல விதங்களில் மாறுபடுகிறது.
முதலீட்டாளர்கள் கவனிக்க வேண்டிய ரிஸ்க்குகள்:
- குறைந்த லிக்விடிட்டி (Liquidity): இரவு நேரங்களில் வர்த்தகம் செய்பவர்களின் எண்ணிக்கை குறைவாக இருக்கும் என்பதால், வாங்கும் விலைக்கும் விற்கும் விலைக்கும் (Bid-Ask Spread) இடையே பெரிய இடைவெளி இருக்க வாய்ப்புள்ளது.
- விலை ஏற்ற இறக்கம்: அதீத விலை மாற்றங்களைத் தவிர்க்க, எக்ஸ்சேஞ்சுகள் 'Static Price Bands' எனப்படும் கட்டுப்பாடுகளை விதித்துள்ளன.
- வர்த்தக விதிகள்: பகல் நேரத்தைப் போல இதில் 'Standard Market Orders' கிடையாது. குறிப்பிட்ட ஆர்டர் வகைகளை மட்டுமே பயன்படுத்த முடியும். அதிகாலை 4:00 மணிக்குள் பூர்த்தியாகாத ஆர்டர்கள் தானாகவே கேன்சல் செய்யப்பட்டுவிடும்.
இந்திய முதலீட்டாளர்களைப் பொறுத்தவரை, அமெரிக்க சந்தையின் இந்த இரவு நேர போக்குகள், இந்திய சந்தையின் தொடக்கத்தை கணிப்பதில் தாக்கத்தை ஏற்படுத்தலாம். இருப்பினும், வர்த்தகம் குறைவாக நடக்கும் நேரங்களில் சந்தையின் போக்கை முழுமையாக நம்புவது ஆபத்தானது என நிபுணர்கள் எச்சரிக்கின்றனர். அமெரிக்க பங்குகள் அல்லது ADR-களில் முதலீடு செய்பவர்கள் கூடுதல் கவனத்துடன் செயல்படுவது அவசியம்.