அக்டோபர் 15-ம் தேதி முதல் ₹2,000-க்கு மேல் நடக்கும் UPI பரிவர்த்தனைகளுக்கு 0.4% கட்டணம் வசூலிக்கும் அரசாங்கத்தின் முடிவை எதிர்த்து தொடரப்பட்ட வழக்கை உச்ச நீதிமன்றம் விசாரிக்க உள்ளது.
அரசாங்கம் கொண்டுவரத் திட்டமிட்டுள்ள இந்த புதிய UPI கட்டண முறை (MDR) செல்லுபடியாகுமா என்பது குறித்து, நீதிபதி சூர்ய காந்த் தலைமையிலான அமர்வு வரும் திங்கட்கிழமை முக்கிய விசாரணையை மேற்கொள்ளவுள்ளது. மத்திய அரசு மற்றும் ரிசர்வ் வங்கி (RBI) இந்த வழக்கின் முதன்மை பிரதிவாதிகளாக சேர்க்கப்பட்டுள்ளன.
வழக்கின் பின்னணி என்ன?
வழக்கறிஞர் அஞ்சன் தத்தா தொடர்ந்த இந்த வழக்கில், கட்டண விதிமுறைகளில் உள்ள வெளிப்படைத்தன்மை குறித்து கேள்வி எழுப்பப்பட்டுள்ளது. 'பேமென்ட் அண்ட் செட்டில்மென்ட் சிஸ்டம்ஸ் ஆக்ட் 2007' சட்டத்தின் 10A பிரிவில் செய்யப்பட்டுள்ள திருத்தம், முறையான நாடாளுமன்ற ஒப்புதல் இன்றி கட்டணங்களை நிர்ணயிக்கும் அதிகாரம் அரசுக்கு வழங்கப்பட்டுள்ளதாக மனுதாரர் வாதிடுகிறார்.
சிறு வணிகர்களுக்கு சிக்கலா?
பல ஆண்டுகளாக UPI பரிவர்த்தனைகள் கட்டணமில்லாமல் (Zero-fee model) நடைபெற்று வருவதே இந்தியாவின் டிஜிட்டல் புரட்சிக்கு முக்கிய காரணம். தற்போது ₹2,000-க்கு மேல் 0.4% கட்டணம் என்பது, ஏற்கனவே குறைந்த லாபத்தில் இயங்கும் சிறு கடைகளுக்கு (Kirana stores) கூடுதல் சுமையை ஏற்படுத்தும். மேலும், RuPay டெபிட் கார்டுகளுக்கு எந்த கட்டணமும் இல்லாத நிலையில், UPI-க்கு மட்டும் ஏன் இந்த பாரபட்சம் என்பது இந்த வழக்கின் முக்கிய வாதமாகும்.
இப்போது அனைவரது பார்வையும் உச்ச நீதிமன்றத்தின் தீர்ப்பின் மீதுதான் உள்ளது. அக்டோபர் 15-ம் தேதி அமலுக்கு வரவிருக்கும் இந்த புதிய விதிமுறைக்கு நீதிமன்றம் தடை விதிக்குமா அல்லது கட்டண முறை தொடருமா என்பது திங்கட்கிழமை தெரியவரும்.