Sebi அதிரடி: சம்பளத்தில் பிடித்தம் செய்து மியூச்சுவல் ஃபண்டில் முதலீடு செய்ய புதிய திட்டம்!

மியூச்சுவல் ஃபண்ட் முதலீட்டாளர்களுக்கு செம்ம சலுகை!

இந்திய பங்குச் சந்தை வாரியம் (Sebi) சில்லறை முதலீட்டாளர்கள் மியூச்சுவல் ஃபண்டுகளில் எளிதாக முதலீடு செய்ய ஒரு புதிய திட்டத்தை யோசித்து வருகிறது. இதற்காக, ஒரு ஆலோசனை அறிக்கையை வெளியிட்டுள்ளது. அதில், 'Payroll-linked SIP' எனப்படும் புதிய முறை பற்றிய விவரங்கள் உள்ளன. இதன் மூலம், முதலீட்டாளரின் சொந்த வங்கிக் கணக்குக்கு பதிலாக, வேறு வழிகளிலும் மியூச்சுவல் ஃபண்டுகளில் முதலீடு செய்ய முடியும்.

சம்பளத்தில் பிடித்தம் செய்து முதலீடு!

இந்த புதிய திட்டத்தின் முக்கிய அம்சம் என்னவென்றால், நிறுவனங்கள் தங்களுடைய ஊழியர்களின் சம்பளத்தில் இருந்து நேரடியாக மியூச்சுவல் ஃபண்ட் முதலீடுகளைச் செய்ய அனுமதிப்பதாகும். இது, தொழிலாளர் வருங்கால வைப்பு நிதி (Provident Fund - PF) மற்றும் தேசிய ஓய்வூதிய அமைப்பு (National Pension System - NPS) ஆகியவற்றில் பிடித்தம் செய்யப்படும் முறையைப் போன்றது. சம்பளப் பிடித்தம் மூலம் நேரடியாக முதலீடு செய்யும் வசதி, சில்லறை முதலீட்டாளர்களின் எண்ணிக்கையை கணிசமாக அதிகரிக்க உதவும் என்று Sebi நம்புகிறது.

பாதுகாப்பு மற்றும் கட்டுப்பாடுகளுடன்!

இந்த புதிய வசதியை யார் வழங்கலாம் என்பதில் Sebi சில கட்டுப்பாடுகளை விதித்துள்ளது. பட்டியலிடப்பட்ட நிறுவனங்கள் (Listed Companies), ஊழியர் வருங்கால வைப்பு நிதி அமைப்பில் (EPFO) பதிவு செய்யப்பட்ட நிறுவனங்கள் மற்றும் சொத்து மேலாண்மை நிறுவனங்கள் (AMCs) மட்டுமே இந்த Payroll SIP-களை வழங்க முடியும். ஊழியர்கள் தங்களுடைய சம்பளத்தில் இருந்து குறிப்பிட்ட மியூச்சுவல் ஃபண்ட் திட்டங்களுக்கு முதலீடு செய்ய தங்களின் முழு சம்மதத்தை அளிக்க வேண்டும். முதலீடுகள் அனைத்தும் ஊழியர்களின் பெயரிலேயே இருக்கும், இது தனிப்பட்ட உரிமை மற்றும் கட்டுப்பாட்டை உறுதி செய்யும். மேலும், சில சமூகப் பங்களிப்புத் திட்டங்களுடன் மியூச்சுவல் ஃபண்ட் பங்களிப்புகளை இணைக்கவும் Sebi பரிசீலித்து வருகிறது. இதன் மூலம், வலுவான ஒழுங்குமுறை மேற்பார்வையுடன் கூடிய முதலீட்டு வழிகளை உருவாக்க முடியும்.