இந்திய பங்குச்சந்தையை பாதுகாக்க SEBI தனது 'Sudarshan' எனும் AI தொழில்நுட்பத்தை தீவிரமாக களமிறக்கியுள்ளது. இதன் மூலம் சந்தேகத்திற்கிடமான ட்ரேடிங் மற்றும் சமூக ஊடகங்களில் நடக்கும் முறைகேடுகளை உடனுக்குடன் கண்டறிய முடியும்.
இந்திய சந்தையில் ட்ரேடிங் வால்யூம் அதிகரித்து வரும் நிலையில், அதன் நம்பகத்தன்மையை உறுதி செய்ய SEBI அதிநவீன AI தொழில்நுட்பத்தை கையில் எடுத்துள்ளது. தற்போது 14 கோடிக்கும் அதிகமான சில்லறை முதலீட்டாளர்களைக் கொண்ட இந்திய சந்தையை கண்காணிக்க, 200-க்கும் மேற்பட்ட பொறியாளர்கள் மற்றும் ஆய்வாளர்களைக் கொண்ட வலுவான தொழில்நுட்ப குழுவை SEBI உருவாக்கியுள்ளது.
சுதர்ஷன் (Sudarshan) எப்படி வேலை செய்கிறது?
2021-ஆம் ஆண்டு அறிமுகப்படுத்தப்பட்ட இந்த 'சுதர்ஷன்' AI தளம், சந்தையில் நடக்கும் ஒவ்வொரு அசைவையும் துல்லியமாக ஸ்கேன் செய்கிறது. குறிப்பாக, டெரிவேட்டிவ்ஸ் ட்ரேடிங் மற்றும் அல்கோரிதமிக் ட்ரேடிங்கில் நடக்கும் அசாதாரண மாற்றங்களை இது கண்டறியும். முன்பெல்லாம் ஒரு மோசடி வழக்கை விசாரிக்க மாதக்கணக்கில் தேவைப்பட்ட நிலையில், இப்போது இந்த AI உதவியால் சில நாட்களிலேயே ஆதாரங்களைச் சேகரிக்க முடிகிறது.
சமூக ஊடக மோசடிகளுக்கு முற்றுப்புள்ளி
Telegram, Instagram மற்றும் X போன்ற தளங்களில் பரப்பப்படும் பங்குச் சந்தை டிப்ஸ் மற்றும் 'பம்ப் அண்ட் டம்ப்' (Pump and Dump) மோசடிகளை தடுக்க SEBI கடுமையான நடவடிக்கைகளை எடுத்து வருகிறது. மாதந்தோறும் சராசரியாக 7,000 பதிவுகளை நீக்கக் கோரி விண்ணப்பிக்கும் SEBI, இதுவரை 1,00,000-க்கும் அதிகமான மோசடி வீடியோக்கள் மற்றும் பதிவுகளை நீக்கியுள்ளது. இது தொற்றுநோய்க்கு முந்தைய காலத்தை விட 40% அதிகம் என்பது குறிப்பிடத்தக்கது.
மனிதர்களின் கண்காணிப்பு அவசியம்
தொழில்நுட்பம் வளர்ந்தாலும், AI-ஐ தவறாக வழிநடத்த (Data Poisoning) முயற்சிக்கும் கும்பலிடம் இருந்து எச்சரிக்கையாக இருக்க வேண்டியது அவசியம். மேலும், ஹார்டுவேர் பற்றாக்குறை போன்ற சவால்களும் உள்ளன. இதனால், AI கொடுக்கும் ஒவ்வொரு அலர்ட்டையும் மனித வல்லுநர்கள் ஆய்வு செய்த பிறகே, அடுத்தகட்ட சட்ட நடவடிக்கைகள் எடுக்கப்படுகின்றன. தொழில்நுட்பம் வெறும் உதவியாளராக மட்டுமே செயல்படும் என்றும், இறுதி முடிவு மனிதர்களிடமே இருக்கும் என்றும் SEBI தெளிவுபடுத்தியுள்ளது.