இந்திய பங்குச்சந்தை ஒழுங்குமுறை ஆணையமான SEBI, சந்தையில் பணப்புழக்கத்தை அதிகரிக்கவும் முதலீட்டு நடைமுறைகளை எளிமையாக்கவும் முக்கிய சீர்திருத்தங்களை அறிவித்துள்ளது.
பங்குச்சந்தை முதலீட்டாளர்கள் மற்றும் இடைத்தரகர்களுக்கான கட்டமைப்பை நவீனப்படுத்தும் நோக்கில் SEBI செப்டம்பர் 24, 2026 அன்று பல்வேறு கட்டமைப்பு மாற்றங்களை அறிவித்துள்ளது. இந்த மாற்றங்கள் போர்ட்ஃபோலியோ மேனேஜ்மெண்ட் முதல் கமாடிட்டி டெரிவேட்டிவ்ஸ் வரை அனைத்து துறைகளையும் உள்ளடக்கியுள்ளது.
PMS முதலீடுகளுக்குப் புதிய கதவுகள்
இனி PMS நிறுவனங்கள் IPO மற்றும் பிரைமரி-மார்க்கெட் கடன் பத்திரங்களில் முதலீடு செய்ய அனுமதிக்கப்படுவர். இதற்காக ₹25 லட்சம் முதலீட்டு வரம்புடன் 'PRIM' வழிமுறை அறிமுகம் செய்யப்பட்டுள்ளது. முதலீட்டாளர்களின் தெளிவான சம்மதத்துடன், ஒரு கிளையண்டின் சொத்து மதிப்பில் 10% வரை பட்டியலிடப்படாத (Unlisted) கடன் பத்திரங்களில் முதலீடு செய்ய மேலாளர்களுக்கு அனுமதி வழங்கப்பட்டுள்ளது.
FPI-களுக்கு கமாடிட்டி சந்தை வாய்ப்பு
வெளிநாட்டு முதலீட்டாளர்கள் (FPI) இனி கமாடிட்டி டெரிவேட்டிவ் சந்தையில் பங்கேற்கலாம். முக்கியமாக, விவசாயம் சாராத, பிஸிக்கல் செட்டில்மென்ட் ஒப்பந்தங்களில் ஈடுபட அவர்களுக்கு அனுமதி அளிக்கப்பட்டுள்ளது. ரிஸ்க்கைக் குறைக்க, டெலிவரி காலத்திற்கு முன்பே அவர்கள் தங்கள் பொசிஷன்களை ஸ்கொயர்-ஆஃப் (Square-off) செய்ய வேண்டும் என SEBI நிபந்தனை விதித்துள்ளது.
AIF அங்கீகாரம் மற்றும் செட்டில்மென்ட் மாற்றங்கள்
Alternative Investment Funds (AIF) முதலீட்டாளர்களுக்கான புதிய அங்கீகார வரம்பு நிர்ணயிக்கப்பட்டுள்ளது. தனிநபர்கள் ₹5 கோடி மற்றும் கார்ப்பரேட் நிறுவனங்கள் ₹20 கோடி சொத்து மதிப்பு கொண்டிருந்தால் மட்டுமே அங்கீகாரம் பெற முடியும். மேலும், செட்டில்மென்ட் விண்ணப்ப கால அவகாசம் 90 நாட்கள் வரை நீட்டிக்கப்பட்டுள்ளது. ₹10 லட்சம் மதிப்பிற்கு குறைவான வழக்குகளை விரைவாக முடிக்க 'பாஸ்ட்-டிராக்' முறை உருவாக்கப்பட்டுள்ளது.
REITs, InvITs மற்றும் புதிய விளம்பர விதிகள்
REITs மற்றும் InvITs நிறுவனங்கள் வெளிநாட்டு சந்தைகளில் Depository Receipts (DRs) வெளியிட அனுமதி வழங்கப்பட்டுள்ளது. மேலும், சந்தை இடைத்தரகர்களுக்கான ஒற்றை விளம்பர விதிமுறை அமலுக்கு வந்துள்ளது. இதில் பிரபலங்களின் விளம்பரங்கள் குறித்த தெளிவான வழிகாட்டுதல்கள் வழங்கப்பட்டுள்ளன. இந்த மாற்றங்கள் நிதி நிறுவனங்களின் செயல்பாட்டு செலவுகளை எப்படி மாற்றும் என்பதை முதலீட்டாளர்கள் கவனிக்க வேண்டும்.