நவம்பர் 1 முதல் டிஜிட்டல் மியூச்சுவல் ஃபண்ட் தளங்களில் 'Direct Plan' கட்டாய டீஃபால்ட் ஆப்ஷனாக மாற்றப்படுகிறது. இதன் மூலம் கமிஷன் செலவுகளைக் குறைத்து முதலீட்டாளர்களின் லாபத்தை அதிகரிக்க SEBI இந்த புதிய உத்தரவைப் பிறப்பித்துள்ளது.
இந்தியாவின் பங்குச்சந்தை கட்டுப்பாட்டு அமைப்பான SEBI, மியூச்சுவல் ஃபண்ட் முதலீட்டாளர்களின் நலனைக் கருத்தில் கொண்டு முக்கிய அறிவிப்பை வெளியிட்டுள்ளது. வரும் நவம்பர் 1, 2026 முதல், அசெட் மேனேஜ்மென்ட் நிறுவனங்களின் டிஜிட்டல் தளங்களில் 'Direct Plans' தான் முதன்மைத் தேர்வாக (Default Option) காட்டப்பட வேண்டும்.
ஏன் இந்த மாற்றம்?
வழக்கமாக, டிஸ்ட்ரிபியூட்டர்கள் மூலம் விற்கப்படும் 'Regular Plans'-ல் கமிஷன் கட்டணம் இருப்பதால், அதன் எக்ஸ்பென்ஸ் ரேஷியோ (Expense Ratio) அதிகமாக இருக்கும். ஆனால், 'Direct Plans'-ல் இந்த கமிஷன் கிடையாது என்பதால் முதலீட்டாளர்களுக்கு கூடுதல் லாபம் கிடைக்கும். இனி முதலீட்டாளர்கள் ஏதேனும் ஒரு காரணத்தினால் 'Regular Plan'-ஐத் தேர்ந்தெடுக்க விரும்பினால், அந்தத் தளங்கள் கட்டண வித்தியாசம் குறித்து தெளிவாக எச்சரிக்க வேண்டும்.
வெளிநாட்டு முதலீட்டாளர்களுக்கு குட் நியூஸ்
SEBI தலைவர் துஹின் காந்தா பாண்டே, அந்நிய நாட்டு முதலீட்டாளர்களை (FPI) ஈர்க்கும் வகையில் முக்கிய மாற்றங்களை அறிவித்துள்ளார். தற்போது வெளிநாட்டு முதலீட்டாளர்கள் இந்தியாவில் பதிவு செய்ய எடுக்கும் கால அளவை வெறும் 5 வேலை நாட்களாக குறைக்க RBI-யுடன் இணைந்து SEBI பணியாற்றி வருகிறது.
AI மூலம் கண்காணிப்பு
சந்தையில் நிலவும் மோசடிகளைத் தடுக்க SEBI நவீன தொழில்நுட்பத்தைப் புகுத்தியுள்ளது. ஏற்கனவே மியூச்சுவல் ஃபண்ட் விளம்பரங்களை கண்காணிக்கப் பயன்படும் R(AI)DAR கருவி, இனி அனைத்து சந்தை இடைத்தரகர்களின் விளம்பரங்களையும் கண்காணிக்கும். மேலும், 'Sudarshan' என்ற கருவி மூலம் சமூக வலைதளங்களில் வரும் தவறான நிதி ஆலோசனைகள் மற்றும் மோசடியான உள்ளடக்கங்களை நீக்கும் நடவடிக்கைகளும் தீவிரப்படுத்தப்பட்டுள்ளன. டிஜிட்டல் தளங்கள் இனி தங்கள் இடைமுகத்தை (Interface) மாற்றியமைப்பதன் மூலம் முதலீட்டாளர்களுக்கு அதிக வெளிப்படைத்தன்மை கிடைக்கும் என்பது குறிப்பிடத்தக்கது.