இந்திய பங்குச்சந்தையில் Exchange-Traded Funds (ETF) வர்த்தகத்திற்காக SEBI கொண்டு வந்த புதிய விதிமுறைகள் இன்று முதல் அமலுக்கு வந்துள்ளன. சந்தை ஸ்திரத்தன்மையை உறுதிப்படுத்தவும், விலையை சரியாகக் கண்டறியவும் இந்த மாற்றம் செய்யப்பட்டுள்ளது.
இந்திய பங்குச்சந்தையில் ETF வர்த்தகத்தில் ஒரு புதிய மைல்கல் எட்டப்பட்டுள்ளது. இன்று செப்டம்பர் 7, 2026 முதல், SEBI அறிவித்த புதிய விதிமுறைகள் நடைமுறைக்கு வந்துள்ளன. உண்மையில் செப்டம்பர் 1 அன்றே இது அமல்படுத்தப்பட வேண்டியது, ஆனால் பங்குச்சந்தைகள் மற்றும் கிளியரிங் நிறுவனங்களின் தொழில்நுட்பத் தேவைகளுக்காக ஒரு வாரம் தள்ளிவைக்கப்பட்டது.
என்னென்ன மாற்றங்கள்?
புதிய கட்டமைப்பின் கீழ், குறிப்பிட்ட ETF-களுக்கு 'Pre-open call auction' அறிமுகப்படுத்தப்பட்டுள்ளது. சந்தை தொடங்குவதற்கு முன்னதாகவே வாங்குபவர்கள் மற்றும் விற்பவர்களின் ஆர்டர்களை ஒருங்கிணைத்து, ஒரே விலையில் வர்த்தகம் செய்ய இது வழிவகை செய்யும். இதன் மூலம், சந்தை தொடங்கும் போது ஏற்படும் திடீர் விலை மாற்றங்கள் (Price Volatility) குறையும்.
அதேபோல், ETF-களின் விலையில் அதிரடி மாற்றங்களைத் தவிர்க்க 'Dynamic Price Bands' அறிமுகப்படுத்தப்பட்டுள்ளன. இது சந்தை விலையை, அதன் உண்மையான சொத்து மதிப்புடன் (NAV) நெருக்கமாக வைத்திருக்க உதவும். இதன் விளைவாக, முதலீட்டாளர்கள் அதிக விலைக்கு அல்லது குறைந்த விலைக்கு ETF-களை வாங்கும் ரிஸ்க் பெருமளவு குறையும்.
செட்டில்மென்ட் முறை
வர்த்தகம் பூர்த்தியாகாத சூழலில், அதை எப்படி கையாள்வது என்பது குறித்த தெளிவான விதிமுறைகளையும் (Standardized close-out procedure) SEBI கொண்டு வந்துள்ளது. இந்த மாற்றம் NSE மற்றும் BSE என அனைத்து பெரிய பிளாட்பார்ம்களுக்கும் பொருந்தும். ஈக்விட்டி, டெப்ட், தங்கம் மற்றும் வெள்ளி என அனைத்து வகையான ETF முதலீடுகளுக்கும் இந்த புதிய விதிகள் பாதுகாப்பு அரணாக இருக்கும்.