பிப்ரவரி 22, 2027 முதல், முதலீட்டாளர்கள் பங்குகளை விற்றுவிட்டு மீண்டும் அதே நாளில் முதலீடு செய்யும் போது, கூடுதல் மார்ஜின் கட்ட வேண்டிய அவசியம் இல்லை என SEBI அறிவித்துள்ளது. இது சிறு புரோக்கர் நிறுவனங்களின் மூலதன சுமையைக் குறைத்து, சந்தையில் பணப்புழக்கத்தை அதிகரிக்க உதவும்.
பங்குச்சந்தை முதலீட்டாளர்களுக்கும் புரோக்கர்களுக்கும் மகிழ்ச்சியான செய்தியை SEBI வெளியிட்டுள்ளது. பிப்ரவரி 22, 2027 முதல், 'Early Pay-In' (EPI) வசதியைப் பயன்படுத்தி முதலீட்டாளர்கள் பங்குகளை விற்கும்போதோ அல்லது வாங்கும்போதோ, கிளியரிங் கார்ப்பரேஷன்கள் இனி கூடுதல் மார்ஜின் தொகையை வசூலிக்கக்கூடாது என்று உத்தரவிடப்பட்டுள்ளது.
புதிய விதி எப்படிச் செயல்படும்?
இதுவரை நடைமுறையில் இருந்த விதிகளின்படி, ஒரு முதலீட்டாளர் பங்குகளை விற்றுவிட்டு, அந்தத் தொகையை வைத்து உடனே புதிய பங்குகளை வாங்கினால், புரோக்கர்கள் தங்கள் சொந்த மூலதனத்திலிருந்து சுமார் 20% வரை மார்ஜின் தொகையை டெபாசிட் செய்ய வேண்டியிருந்தது. இது சிறிய புரோக்கர் நிறுவனங்களுக்குப் பெரும் நிதி நெருக்கடியை ஏற்படுத்தி வந்தது. இனி, EPI மூலம் உறுதிப்படுத்தப்பட்ட வர்த்தகங்களுக்கு, கூடுதல் மார்ஜின் தேவையில்லை என்பது புரோக்கர்களின் சுமையைக் பெருமளவில் குறைக்கும்.
சந்தை பணப்புழக்கத்திற்கு உதவுமா?
இந்தியப் பங்குச்சந்தையில் பணப்புழக்கம் சற்று மந்தமாகவே இருந்தது. NSE தரவுகளின்படி, கடந்த நிதியாண்டில் சராசரி தினசரி வர்த்தகம் (Daily Turnover) 7% சரிந்து ₹1.05 டிரில்லியன் ஆக இருந்தது. அதேபோல், கடந்த ஜனவரி முதல் அக்டோபர் வரை சந்தை மூலதனம் 6% வரை சுருங்கியது. இந்த இக்கட்டான சூழலில், வர்த்தக முறையை எளிதாக்குவதன் மூலம் சந்தையில் மீண்டும் சுறுசுறுப்பை ஏற்படுத்த SEBI திட்டமிட்டுள்ளது.
முதலீட்டாளர்கள் கவனத்திற்கு
இந்த மாற்றம் புரோக்கர்களின் செலவை மட்டும் குறைப்பதோடு நின்றுவிடாமல், ஒட்டுமொத்த வர்த்தகச் சுழற்சியையும் எளிதாக்குகிறது. இருப்பினும், இந்த வசதியைப் பெற புரோக்கர் நிறுவனங்கள் தங்கள் தொழில்நுட்ப வசதிகளை உடனுக்குடன் மேம்படுத்த வேண்டியது அவசியம். சந்தையின் ஒட்டுமொத்த ஏற்றத்தாழ்வுகள் இன்னும் மேக்ரோ-பொருளாதார சூழலைப் பொறுத்தே அமையும் என்றாலும், இந்த ரெகுலேட்டரி மாற்றம் சந்தையில் பங்கேற்பை அதிகரிக்க ஒரு நேர்மறையான படியாகப் பார்க்கப்படுகிறது.