SEBI அதிரடி: 15 முதலீட்டு ஆலோசகர்களின் உரிமம் ரத்து! காரணம் தெரியுமா?

இந்திய பங்குச்சந்தை ஒழுங்குமுறை ஆணையமான SEBI, சட்டப்படி செலுத்த வேண்டிய புதுப்பித்தல் கட்டணத்தைச் செலுத்தத் தவறிய 15 முதலீட்டு ஆலோசகர்களின் (Investment Advisers) பதிவுச் சான்றிதழ்களை ரத்து செய்து அதிரடியாக அறிவித்துள்ளது. ஏற்கனவே பலமுறை இதுகுறித்து எச்சரிக்கைகள் விடுக்கப்பட்டும், சம்பந்தப்பட்ட நிறுவனங்கள் கட்டணத்தைச் செலுத்தவோ அல்லது இதுகுறித்து விளக்கமளிக்கவோ தவறியதால் இந்த இறுதி முடிவு எடுக்கப்பட்டுள்ளது.

SEBIயின் விதிமுறைகள் என்ன சொல்கிறது?

SEBIயின் முதலீட்டு ஆலோசகர்கள் விதிமுறைகளின்படி, பதிவு செய்யப்பட்ட ஆலோசகர்கள் தங்கள் உரிமத்தை ஒவ்வொரு ஐந்து வருடங்களுக்கும் புதுப்பிக்க வேண்டும். அதற்கான கட்டணத்தையும் செலுத்த வேண்டும். ஆனால், இந்த 15 நிறுவனங்களும் இந்த விதிமுறைகளைப் பின்பற்றவில்லை.

யார் யாரெல்லாம் பாதிக்கப்பட்டுள்ளனர்?

Capvision Investment Advisor, Wise Finserv, Money India Research, Exfinity Venture Partners LLP போன்ற நிறுவனங்களும், Hardik Mahendrakumar Shukla, Sharanjit Singh, Tanya Gupta போன்ற தனிப்பட்ட ஆலோசகர்களும் இந்த நடவடிக்கையால் பாதிக்கப்பட்டுள்ளனர்.

உரிமம் ரத்து செய்யப்பட்டாலும் பொறுப்புகள் உண்டா?

உரிமம் ரத்து செய்யப்பட்டாலும், இந்த நிறுவனங்களும் தனிநபர்களும் கடந்த காலத்தில் செய்துகொண்ட ஒப்பந்தங்கள், முதலீட்டாளர் குறைகளைத் தீர்ப்பது, பதிவேடுகளைப் பராமரிப்பது போன்ற அனைத்துப் பொறுப்புகளிலிருந்தும் தப்ப முடியாது. முந்தைய செயல்பாடுகளுக்கு அவர்களே பொறுப்பாவார்கள் என்று SEBI தெளிவாக தெரிவித்துள்ளது.

முதலீட்டாளர்களுக்கான முக்கிய அறிவுரை

முதலீட்டாளர்கள், தாங்கள் ஆலோசனை பெறும் ஆலோசகர்களின் தகுதிகளை எப்போதும் சரிபார்ப்பது அவசியம். SEBI இணையதளத்தில் அவர்களின் பதிவு நிலை (Registration Status) என்ன என்பதைத் தெரிந்துகொள்ளலாம். உரிமம் ரத்து செய்யப்பட்ட ஒருவரால் இனி SEBIயின் மேற்பார்வையின் கீழ் ஆலோசகராக செயல்பட முடியாது. மேலும், இவர்களிடம் ஏதேனும் குறைகள் அல்லது நிலுவையில் உள்ள பிரச்சனைகள் இருந்தால், உரிமம் ரத்து செய்யப்பட்டாலும், அதைத் தீர்க்க உரிய நடவடிக்கைகளை மேற்கொள்ள வேண்டும்.