Byju’s (Think and Learn Private Limited) நிறுவனத்தின் சொத்துகளை ஏலத்தில் விற்றதில் முறைகேடு நடந்ததாக எழுந்த புகாரைத் தொடர்ந்து, அந்த சொத்துகளை விற்க பெங்களூரு NCLT தடை விதித்துள்ளது.
எடெக் நிறுவனமான Byju’s (Think and Learn Private Limited) சொத்துகள் ஏலத்தில் விற்கப்பட்ட விவகாரத்தில், பெங்களூருவில் உள்ள தேசிய நிறுவன சட்ட தீர்ப்பாயம் (NCLT) அதிரடியாக தலையிட்டுள்ளது. ₹150 கோடி மதிப்புள்ள சொத்துகளை வெறும் ₹16 கோடிக்கு விற்பனை செய்ததாக எழுந்த புகாரைத் தொடர்ந்து, சொத்துகளை மாற்றவோ அல்லது விற்கவோ தடை விதித்து நீதிமன்றம் உத்தரவிட்டுள்ளது.
இந்த ஏலம் ஆகஸ்ட் 2, 2026 அன்று நடைபெற்றது. இந்த சொத்துகளை வாங்கிய Comprint Tech Solutions (I) Private Limited நிறுவனம், சொத்துகளை நகர்த்தவோ அல்லது விற்கவோ கூடாது என உத்தரவிடப்பட்டுள்ளது. சொத்துகளின் பாதுகாப்பை உறுதி செய்ய, வாங்கிய பொருட்கள் அனைத்தின் முழுமையான விவரங்கள், புகைப்படங்கள் மற்றும் சேமிப்பு இடங்கள் குறித்த அறிக்கையை ஒரு வாரத்திற்குள் சமர்ப்பிக்க வேண்டும் என்றும் தீர்ப்பாயம் கூறியுள்ளது.
இன்சால்வென்சி செயல்பாட்டில் சிக்கல்
இந்த விவகாரம் Byju’s நிறுவனத்தின் திவால் (Insolvency) நடவடிக்கைகளில் பெரும் குழப்பத்தை ஏற்படுத்தியுள்ளது. K3 Education Private Limited-ன் ரெசல்யூஷன் ப்ரொபஷனல் மற்றும் பைஜூஸ் நிறுவனத்தின் முன்னாள் இயக்குநர்கள் இந்த ஏலத்திற்கு எதிராக சட்டப் போராட்டம் நடத்தி வருகின்றனர். ஏல செயல்பாட்டில் வெளிப்படைத்தன்மை இல்லை என்றும், சொத்துகளின் மதிப்பு முறையாகக் கணக்கிடப்படவில்லை என்றும் குற்றம் சாட்டியுள்ளனர்.
அடுத்தகட்ட நடவடிக்கை என்ன?
வழக்கின் அடுத்த விசாரணை செப்டம்பர் 21, 2026 அன்று நடைபெற உள்ளது. அதுவரை சொத்துகள் அனைத்தும் 'Status Quo' நிலையில், அதாவது அப்படியே வைக்கப்பட வேண்டும். கடனாளிகள் மற்றும் ஊழியர்களுக்குத் தர வேண்டிய நிலுவைத் தொகையை மீட்பதில் இந்த ஏல முறைகேடு பெரிய தடையாக இருக்கும் என்பதால், நீதிமன்றத்தின் இந்த உத்தரவு முக்கியத்துவம் பெறுகிறது.