இந்தியாவில் 2025-ம் ஆண்டில் மட்டும் முதலீட்டு மோசடிகளால் முதலீட்டாளர்கள் **₹22,000 கோடி**க்கும் மேல் இழந்துள்ளனர். போலி ப்ரோக்கரேஜ் ஆப் மற்றும் சமூக வலைதளங்கள் மூலம் நடக்கும் இந்த நவீன மோசடிகளை கண்டறிவது எப்படி?
இந்தியாவில் முதலீட்டு மோசடிகள் தற்போது உச்சகட்டத்தை எட்டியுள்ளன. 2025-ல் மட்டும் மக்கள் ₹22,000 கோடிக்கும் மேலான பணத்தை இழந்துள்ளனர். பங்குச்சந்தையில் சில்லறை முதலீட்டாளர்களின் எண்ணிக்கை அதிகரிக்க அதிகரிக்க, மோசடி கும்பல்களின் புத்திசாலித்தனமான தந்திரங்களும் வளர்ந்து வருகின்றன. இவை சாதாரண மின்னஞ்சல் மோசடிகளை விட மிகவும் சிக்கலானவை.
போலி டிரேடிங் செயலிகள் (Counterfeit Apps)
புகழ்பெற்ற ப்ரோக்கரேஜ் நிறுவனங்களின் செயலிகளைப் போலவே வடிவமைக்கப்பட்ட போலி ஆப்-களை இந்த கும்பல் உருவாக்குகிறது. இதில் முதலீடு செய்தால் IPO ஒதுக்கீடு கிடைக்கும் என ஆசை வார்த்தைகளை கூறுவார்கள். நீங்கள் பணத்தை டெபாசிட் செய்தவுடன், அந்த செயலியில் உங்கள் பணம் பல மடங்கு வளர்வது போல காட்டும். ஆனால், பணத்தை எடுக்க முயலும்போது டாக்ஸ் அல்லது கமிஷன் என்ற பெயரில் மீண்டும் பணம் கேட்டு மிரட்டுவார்கள். எந்தவொரு செயலியை பயன்படுத்துவதற்கு முன்பும் அது SEBI-யிடம் பதிவு செய்யப்பட்டுள்ளதா என்பதை உறுதிப்படுத்துங்கள்.
சமூக வலைதள 'நிபுணர்கள்'!
WhatsApp மற்றும் Telegram குரூப்கள் மூலம் மோசடி கும்பல் தங்களை முதலீட்டு நிபுணர்களாக காட்டிக்கொள்கிறார்கள். வெவ்வேறு நபர்களுக்கு வெவ்வேறு டிப்ஸ் கொடுத்து, கடைசியில் லாபம் அடைந்தவர்களை மட்டும் தேர்ந்தெடுத்து, அவர்களை நம்ப வைத்து கட்டணத் திட்டங்களை விற்கிறார்கள். முறையான நிதி ஆலோசகர்கள் ஒருபோதும் இது போன்ற குரூப்களில் 'இன்சைடர் டிப்ஸ்' தர மாட்டார்கள் என்பதை கவனத்தில் கொள்ளுங்கள்.
பான்ஸி மற்றும் உறுதியான வருமானம்
எந்த ரிஸ்க்கும் இல்லாமல் அதிக லாபம் தருவதாக உறுதியளிக்கும் திட்டங்கள் அனைத்தும் பான்ஸி ஸ்கீம்கள் (Ponzi Schemes) தான். புதிய முதலீட்டாளர்களின் பணத்தை வைத்து பழையவர்களுக்கு லாபம் கொடுக்கும் இந்த சுழற்சி, ஒரு கட்டத்தில் உடைந்துவிடும். அதிக வருமானம் தரும் எந்த திட்டமும் சந்தை அபாயத்திற்கு உட்பட்டது என்பதை மறக்காதீர்கள்.
உங்கள் பணத்தை பாதுகாப்பது எப்படி?
நீங்கள் மோசடி செய்யப்பட்டதாக உணர்ந்தால், உடனே 1930 என்ற சைபர் கிரைம் ஹெல்ப்லைன் எண்ணிற்கு அழையுங்கள். அல்லது CFCFRMS இணையதளத்தில் புகார் செய்யுங்கள். முன்பின் தெரியாத நபர்கள் அனுப்பும் லிங்க்குகளை கிளிக் செய்யாதீர்கள். அதிகாரப்பூர்வ எக்ஸ்சேஞ்ச் தளங்களில் ப்ரோக்கர் உரிமத்தை சரிபார்ப்பது உங்களின் முதல் பாதுகாப்பு கேடயம்.