ஜனவரி 1, 2027 முதல் இ-காமர்ஸ் நிறுவனங்களுக்கு புதிய விதிமுறைகள் அமலுக்கு வருகிறது. இனி 'strike-through' விலைகளை காட்ட முடியாது, கடந்த 30 நாட்களின் குறைந்தபட்ச விலையை மட்டுமே டிஸ்கவுண்டிற்கு அடிப்படையாக வைக்க வேண்டும்.
2027-ம் ஆண்டு ஜனவரி 1-ம் தேதி முதல் இந்தியாவில் இ-காமர்ஸ் சந்தையில் பெரிய மாற்றம் வரப்போகிறது. புதிய Consumer Protection (E-Commerce) Amendment Rules படி, இனி கம்பெனிகள் தாங்கள் தரும் டிஸ்கவுண்டுகளை, கடந்த 30 நாட்களாக அந்த பொருளின் குறைந்தபட்ச விலையுடன் (Lowest Price) ஒப்பிட்டு மட்டுமே காட்ட வேண்டும்.
ஏன் இந்த மாற்றம்?
பல நிறுவனங்கள் ஒரு பொருளின் விலையை வேண்டுமென்றே உயர்த்தி காட்டிவிட்டு, அதிலிருந்து பெரிய டிஸ்கவுண்ட் தருவது போல 'strike-through' விலையை காண்பிக்கும். இதனால் வாடிக்கையாளர்கள் ஏமாற்றப்படுகிறார்கள். இனி விற்பனையாளர்கள் உண்மையான விலையை மட்டுமே காட்ட வேண்டியிருக்கும்.
நிறுவனங்களுக்கு என்ன சவால்?
இது வெறும் மார்க்கெட்டிங் பிரச்சனை மட்டுமல்ல, பெரிய தொழில்நுட்ப மாற்றமும் கூட. ஒவ்வொரு SKU-வின் விலை வரலாற்றையும் துல்லியமாக பராமரிக்க வேண்டும். லாயல்டி ஆஃபர்கள், ரீஜினல் டிஸ்கவுண்ட் என அனைத்தையும் கணக்கில் கொள்ள வேண்டியிருப்பதால், நிறுவனங்களின் செயல்பாட்டு செலவு (Operational Cost) அதிகரிக்கும்.
முதலீட்டாளர்கள் கவனிக்க வேண்டியது என்ன?
பல D2C பிராண்டுகள் இதுவரை அதிக டிஸ்கவுண்ட் கொடுத்து வாடிக்கையாளர்களை ஈர்த்தன. ஆனால் இனி இந்த உத்தி வேலைக்கு ஆகாது. லாபத்தை தக்கவைக்க நிறுவனங்கள் தங்கள் வணிக மாதிரியை மாற்ற வேண்டியிருக்கும். குறுகிய காலத்தில் நிறுவனங்களின் செலவுகள் அதிகரிக்கலாம், ஆனால் நீண்ட காலத்தில் இது ஒரு ஆரோக்கியமான வளர்ச்சியை தரும்.
வரவிருக்கும் காலாண்டு முடிவுகளில், நிறுவனங்கள் இந்த புதிய விதிகளால் மார்க்கெட்டிங் பட்ஜெட் மற்றும் ப்ராஃபிட் மார்ஜின் எப்படி மாறப்போகிறது என்பதை விளக்குவார்கள் என்று எதிர்பார்க்கப்படுகிறது.