TVS குழுமத்தின் வேணு சீனிவாசன் குடும்பத்தில் நிலவும் வாரிசுரிமை மோதல் குறித்து, ப்ராக்ஸி அட்வைஸர் நிறுவனமான InGovern கடும் எச்சரிக்கை விடுத்துள்ளது.
TVS குழுமத்தின் உரிமையாளர்கள் குடும்பத்தில் ஏற்பட்டுள்ள வாரிசுரிமை தகராறு, கார்ப்பரேட் நிர்வாகத்தை பாதிக்கக்கூடும் என்று InGovern Research Services எச்சரித்துள்ளது. கடந்த கால ஒப்பந்தங்களை மீண்டும் கேள்விக்குள்ளாக்குவது, சிறு முதலீட்டாளர்களுக்கு நிச்சயமற்ற தன்மையை உருவாக்கும் என்று அந்த நிறுவனம் சுட்டிக்காட்டியுள்ளது.
குடும்பத்திற்குள் நடப்பது என்ன?
இந்த மோதல் வேணு சீனிவாசன் மற்றும் சுதர்சன் வேணு ஒரு தரப்பாகவும், மல்லிகா சீனிவாசன் மற்றும் லட்சுமி வேணு மற்றொரு தரப்பாகவும் பிரிந்து செயல்படுவதால் ஏற்பட்டுள்ளது. மார்ச் 2024-ல் கையெழுத்தான புரிந்துணர்வு ஒப்பந்தம் தொடர்பாகவே இந்த கருத்து வேறுபாடு நீடிக்கிறது. 2020-ம் ஆண்டு எட்டப்பட்ட தீர்வுடன் சொத்து பகிர்வு முடிந்துவிட்டதாக ஒரு தரப்பு கூற, இறுதித் தீர்வு இன்னும் வரவில்லை என மறுதரப்பு வாதாடுகிறது.
சட்ட ரீதியான நடவடிக்கைகள்
இந்த மோதல் தற்போது NCLT மற்றும் சென்னை நீதிமன்றங்களுக்கு சென்றுள்ளது. இரு தரப்பினரும் 'கேவியட்' (Caveat) மனுக்களைத் தாக்கல் செய்துள்ளனர். TVS Motor Company மற்றும் TVS Holdings ஆகியவற்றின் செயல்பாடுகள் தற்போதைக்கு சீராக இருந்தாலும், இந்த குடும்பப் பிரச்சினை பொதுவெளிக்கு வருவது நிறுவனத்தின் எதிர்கால முடிவுகளை பாதிக்கலாம் என்று அஞ்சப்படுகிறது.
முதலீட்டாளர்கள் கவனத்திற்கு
நிறுவனத்தின் நீண்டகால வியூகங்கள் மற்றும் நிர்வாகத் தெளிவில் எந்த சமரசமும் இருக்கக்கூடாது என்பதில் InGovern உறுதியாக உள்ளது. பங்குச் சந்தை விதிகளின்படி, இந்த தகராறு குறித்து நிறுவனங்கள் முறையான வெளிப்படையான விளக்கங்களை (Disclosures) முதலீட்டாளர்களுக்கு வழங்க வேண்டும் என்று அந்த நிறுவனம் பரிந்துரைத்துள்ளது.