GST Council அக்டோபர் 7-ம் தேதி கூடவுள்ளது. இந்த கூட்டத்தில் ஜிஎஸ்டி வரி விகிதங்களில் மாற்றம் இருக்காது என்றும், மாறாக நிறுவனங்களுக்கான நடைமுறை சிக்கல்களை தீர்ப்பதில் கவனம் செலுத்தப்படும் என்றும் அறிவிக்கப்பட்டுள்ளது.
நீண்ட இடைவெளிக்கு பிறகு, அக்டோபர் 7-ம் தேதி GST Council மீண்டும் கூடவுள்ளது. சந்தையை பொறுத்தவரை, இது ஒரு முக்கிய நிகழ்வாக பார்க்கப்படுகிறது. அரசு தரப்பில், இந்த முறை வரி விகித மாற்றங்களை விட, நிர்வாக ரீதியான மற்றும் நடைமுறை சீர்திருத்தங்களுக்கு (Procedural Reforms) அதிக முக்கியத்துவம் கொடுக்கப்படும் என தெளிவுபடுத்தப்பட்டுள்ளது. இதனால் பணவீக்கம் அல்லது துறை சார்ந்த வரி மாற்றங்கள் குறித்த தேவையற்ற அச்சம் முதலீட்டாளர்களுக்கு குறையும்.
Input Tax Credit (ITC) பிரச்சனைகள்
நிறுவனங்களுக்கு தற்போது இருக்கும் மிகப்பெரிய தலைவலி 'Input Tax Credit' மறுக்கப்படுவதுதான். சப்ளையர்கள் வரியை முறையாக செலுத்தாதபோது, வாங்குபவர்கள் (Buyers) பாதிக்கப்படுகின்றனர். இத்தகைய சிக்கல்களில் இருந்து உண்மையான வரி செலுத்துபவர்களை காக்க புதிய வழிமுறைகளை கவுன்சில் ஆலோசிக்க உள்ளது. இது நடைமுறைக்கு வந்தால், பல்வேறு நிறுவனங்களின் பணிமூலதன சுழற்சி (Working Capital Cycle) வேகமெடுக்கும்.
பதிவு மற்றும் சட்டப் போராட்டங்கள்
சிறிய நிறுவனங்களுக்கான பதிவு முறைகள் ஏற்கனவே எளிமைப்படுத்தப்பட்டுள்ள நிலையில், இப்போது பெரிய நிறுவனங்களுக்கும் (மாதம் ₹2.5 லட்சம் மேல் ஐடிசி கோருபவர்கள்) அதே போன்ற எளிமையான நடைமுறைகளை கொண்டு வர அரசு திட்டமிட்டுள்ளது.
மேலும், ₹2,500 கோடி Compensation Cess தொடர்பான சட்டச் சிக்கலும் விவாதத்திற்கு வரலாம். இதனுடன், மோட்டார் வாகனங்கள், பயணச் செலவுகள் மற்றும் உணவுச் சேவை போன்ற பிரிவுகளுக்கு தற்போது இருக்கும் ஐடிசி கட்டுப்பாடுகளைத் தளர்த்துவது குறித்தும் ஆலோசனைகள் நடைபெற உள்ளன. இந்த சீர்திருத்தங்கள் நிறுவனங்களின் செயல்பாட்டு செலவுகளைக் குறைக்குமா என்பதைப் பொறுத்திருந்துதான் பார்க்க வேண்டும்.