McNally Bharat Engineering நிறுவனத்தின் **17** இடங்களில் ED அதிரடி சோதனை நடத்தியுள்ளது. அந்நிய செலாவணி மேலாண்மை சட்டம் (FEMA) மற்றும் திவால் நடைமுறையில் முறைகேடு நடந்ததாக எழுந்த புகாரால், நிறுவனத்தின் எதிர்காலம் குறித்த சந்தேகம் முதலீட்டாளர்கள் மத்தியில் எழுந்துள்ளது.
புதன்கிழமை காலை முதல் கொல்கத்தா, டெல்லி மற்றும் பெங்களூரு உட்பட நாட்டின் பல பகுதிகளில் உள்ள 17 இடங்களில் அமலாக்கத்துறை (ED) அதிகாரிகள் அதிரடி சோதனையில் ஈடுபட்டுள்ளனர். McNally Bharat Engineering Company Limited நிறுவனத்தின் மீது சுமத்தப்பட்டுள்ள நிதி முறைகேடு புகார்கள் தொடர்பாக இந்த விசாரணை தீவிரமடைந்துள்ளது.
விசாரணையின் மையப்பகுதி
இந்த நிறுவனம் அண்மையில் முடிவுக்கு வந்த 'கார்ப்பரேட் திவால் தீர்வு' (CIRP) செயல்பாட்டில் முறைகேடுகள் செய்துள்ளதாக ED சந்தேகிக்கிறது. முக்கியமாக, அன்னிய செலாவணி மேலாண்மை சட்டத்தின் (FEMA) கீழ் விதிமீறல்கள் நடந்துள்ளதா என்பது குறித்து அதிகாரிகள் ஆய்வு செய்து வருகின்றனர். நிறுவனத்தை கையகப்படுத்தும் போது பயன்படுத்தப்பட்ட நிதியின் மூலம் என்ன, அதன் பின்னணியில் உள்ள முதலீட்டாளர்கள் யார் என்பது போன்ற மர்மங்களை உடைக்க ED தரப்பு முனைப்பு காட்டி வருகிறது.
IBC விதிகளை மீறினாரா?
இந்த விசாரணையில் மிக முக்கியமான அம்சம் திவால் மற்றும் நொடிப்பு சட்டம் (IBC) பிரிவு 29A ஆகும். திவால் ஆன நிறுவனத்தின் பழைய உரிமையாளர்கள் அல்லது முறைகேடுகளில் ஈடுபட்ட நபர்கள், மீண்டும் பின்வாசல் வழியாக நிறுவனத்தைக் கைப்பற்றுவதைத் தடுப்பதே இந்த சட்டத்தின் முக்கிய நோக்கம். ஒருவேளை இந்த விதிகள் மீறப்பட்டிருப்பது உறுதி செய்யப்பட்டால், நிறுவனத்தின் நிர்வாகக் குழு மற்றும் உரிமையாளர்கள் கடுமையான சட்ட சிக்கல்களைச் சந்திக்க நேரிடும்.
முதலீட்டாளர்கள் கவனத்திற்கு
ஏற்கனவே கடன் சுமையால் சிக்கித் தவித்து வரும் McNally Bharat, தற்போது இந்த புதிய சட்ட சிக்கலால் தனது செயல்பாடுகளில் பின்னடைவைச் சந்திக்கலாம். நிறுவனத்தின் கடன் குறைப்பு மற்றும் எதிர்கால திட்டங்கள் அனைத்தும் இனிவரும் காலங்களில் நீதிமன்ற மற்றும் அரசு அமைப்புகளின் முடிவுகளைப் பொறுத்தே அமையும். எனவே, நிறுவனம் இது தொடர்பாக பங்குச்சந்தைகளுக்கு வழங்கும் அதிகாரப்பூர்வ விளக்கத்தை முதலீட்டாளர்கள் கூர்ந்து கவனிக்க வேண்டியது அவசியம்.