பங்குச்சந்தை மோசடி தொடர்பாக RM Drip and Sprinklers Systems மற்றும் R&B Denims நிறுவனங்களுடன் தொடர்புடைய 29 இடங்களில் அமலாக்கத்துறை (ED) அதிரடி சோதனை நடத்தியுள்ளது. 1 லட்சம் முதலீட்டாளர்களை ஏமாற்றி 'பம்ப் அண்ட் டம்ப்' (Pump and Dump) செய்ததாக குற்றம் சாட்டப்பட்டுள்ளது.
பங்குச்சந்தையில் திட்டமிட்ட மோசடியில் ஈடுபட்டதாகக் கூறப்படும் RM Drip and Sprinklers Systems மற்றும் R&B Denims நிறுவனங்கள் மீது அமலாக்கத்துறை (ED) தனது விசாரணையை தீவிரப்படுத்தியுள்ளது. நாடு முழுவதும் 6 நகரங்களில் உள்ள 29 இடங்களில் ஒரே நேரத்தில் இந்த சோதனை மேற்கொள்ளப்பட்டது.
மோசடி நடந்தது எப்படி?
இந்த நிறுவனங்கள் 'பம்ப் அண்ட் டம்ப்' எனும் திட்டமிட்ட மோசடியில் ஈடுபட்டதாக விசாரணை அதிகாரிகள் தெரிவிக்கின்றனர். கடந்த 2023 ஏப்ரல் முதல் 2024 மார்ச் வரையிலான காலத்தில், சுமார் 3.5 கோடி ஷேர்கள் மற்றும் கன்வெர்ட்டிபிள் வாரண்டுகளை ரகசியக் கூட்டணிக்கு வழங்கியுள்ளனர்.
இதனைத் தொடர்ந்து, சமூக வலைதளங்கள் மற்றும் 'Multibagger Stocks' என்ற பெயரில் இயங்கும் மெசேஜிங் குரூப்கள் மூலம் செயற்கையான விளம்பரங்களை உருவாக்கி, முதலீட்டாளர்களை வரவழைத்துள்ளனர். 2025 டிசம்பர் முதல் 2026 பிப்ரவரி வரை சுமார் 1 லட்சம் சிறு முதலீட்டாளர்களைக் கவர்ந்து, அந்தப் பங்குகளை அதிக விலைக்கு வாங்க வைத்துள்ளனர்.
முதலீட்டாளர்களுக்கு விழுந்த அடி
பிப்ரவரி 2026-ல், இந்த மோசடி கும்பல் தாங்கள் இயக்கிய அனைத்து மெசேஜிங் குரூப்களையும் டெலீட் செய்துவிட்டு, லாபத்தை எடுத்துக்கொண்டு வெளியேறியது. இதனால் அந்தப் பங்குகளின் விலை திடீரென 70% சரிந்தது. தற்போது முதலீட்டாளர்கள் விற்க வழியின்றித் தவித்து வருகின்றனர்.
PMLA சட்டத்தின் கீழ் விசாரணை
தற்போது இந்த விவகாரத்தை 'பணமோசடி தடுப்புச் சட்டத்தின்' (PMLA) கீழ் அமலாக்கத்துறை விசாரித்து வருகிறது. சோதனையின் போது கைப்பற்றப்பட்ட டிஜிட்டல் சாதனங்கள் மற்றும் சொத்து ஆவணங்கள் மூலம், மோசடியின் முக்கிய மூளையாகச் செயல்பட்டவர்கள் யார் என்பது குறித்து விசாரணை நடந்து வருகிறது. சமூக வலைதளங்களில் வரும் உறுதிப்படுத்தப்படாத முதலீட்டு ஆலோசனைகளை நம்பி முதலீட்டாளர்கள் கவனமாக இருக்க வேண்டும் என அதிகாரிகள் எச்சரித்துள்ளனர்.