GST முறைகேடு வழக்குகளில் இனி வரி ஏய்ப்பு செய்வதற்கான தெளிவான 'நோக்கம்' (Intent to evade) இருந்ததை அதிகாரிகள் நிரூபித்தாலே அபராதம் விதிக்க முடியும். சிறிய கணக்கு பிழைகளுக்கு எல்லாம் இனி கடுமையான நடவடிக்கை எடுக்கப்படாது.
இனிமேல் இந்திய வரி அதிகாரிகள், வரி ஏய்ப்பு செய்ததாக ஒரு நிறுவனம் மீது நடவடிக்கை எடுக்கும் முன், அந்த நிறுவனம் திட்டமிட்டே வரி ஏய்ப்பு செய்ய முயன்றதற்கான உறுதியான ஆதாரங்களை காட்ட வேண்டியது கட்டாயம். இது தொடர்பாக Central Board of Indirect Taxes and Customs (CBIC) புதிய சுற்றறிக்கையை வெளியிட்டுள்ளது.
எதற்கெல்லாம் இனி அபராதம் இல்லை?
இதுவரை GST சட்டத்தின் Section 74-ன் கீழ், கணக்கு வழக்குகளில் ஏற்படும் சிறிய குளறுபடிகள் அல்லது எழுத்துப் பிழைகளைக்கூட வரி ஏய்ப்பாகக் கருதி கடும் அபராதங்கள் விதிக்கப்பட்டு வந்தன. இதனால் பல நிறுவனங்கள் நீண்ட கால சட்டப் போராட்டங்களைச் சந்திக்க நேரிட்டது. இனி, இத்தகைய சிறு தவறுகளுக்கு மோசடி முத்திரை குத்தப்படாது.
அதிகாரிகளுக்கு புதிய விதிகள்
நிர்வாக ரீதியான பிழைகளைத் தாண்டி, வரி ஏய்ப்பு செய்ய வேண்டும் என்ற உள்நோக்கம் இருந்ததா என்பதை அதிகாரிகள் இனி தெளிவுபடுத்த வேண்டும். இது சட்டத்தின் பெயரில் அதிகாரிகள் மேற்கொள்ளும் கெடுபிடிகளைக் குறைக்க உதவும்.
வரவிருக்கும் மற்ற மாற்றங்கள்
GST கவுன்சில் கூட்டத்தின் முடிவுகளின்படி, வரி தொடர்பான குற்றங்களுக்கான வரம்பு ₹1 கோடி என்பதில் இருந்து ₹5 கோடி ஆக உயர்த்தப்பட உள்ளது. மேலும், ஏப்ரல் மாதம் முதல் சில கைது அதிகாரங்களை நீக்குவதற்கும் திட்டமிடப்பட்டுள்ளது. இத்தகைய சீர்திருத்தங்கள் மூலம் இந்தியாவில் தொழில்கள் செய்வது எளிதாகும் (Ease of Doing Business).
இந்த மாற்றங்கள் நிறுவனங்களுக்குப் பெரிய நிம்மதியை அளித்தாலும், வரி செலுத்துவதிலிருந்து யாருக்கும் விலக்களிக்கப்படவில்லை என்பதை கவனத்தில் கொள்ள வேண்டும். வரி ஏய்ப்பு நோக்கத்துடன் செயல்படுவோர் மீது நடவடிக்கை தொடரும் என அதிகாரிகள் எச்சரித்துள்ளனர்.