GST பதிவுக்கு இனி காத்துக்கிடக்க வேண்டாம். CBIC வெளியிட்டுள்ள புதிய உத்தரவின்படி, 7 நாட்களில் அனுமதி கிடைக்காத பட்சத்தில், அது தானாகவே 'அப்ரூவல்' ஆகிவிடும்.
புதிய விதிமுறை என்ன?
மத்திய மறைமுக வரிகள் மற்றும் சுங்க வாரியம் (CBIC), ஜிஎஸ்டி (GST) பதிவு நடைமுறைகளில் ஒரு முக்கிய மாற்றத்தைக் கொண்டு வந்துள்ளது. இனி ஒரு நிறுவனம் விண்ணப்பித்து 7 நாட்கள் வரை அதிகாரிகள் எந்த பதிலும் அளிக்கவில்லை என்றால், அந்த விண்ணப்பம் தானாகவே அங்கீகரிக்கப்பட்டதாக (Deemed Approval) கருதப்படும். முன்னதாக, சுமார் 39% விண்ணப்பங்கள் அதிகாரிகளின் மேனுவல் சரிபார்ப்பிற்காக நீண்ட காலம் தேங்கிக் கிடந்தன. அந்தத் தடையை நீக்கவே இந்த அதிரடி முடிவு எடுக்கப்பட்டுள்ளது.
ஆதார் சரிபார்ப்பு மற்றும் காலக்கெடு
ஆதார் பயோமெட்ரிக் சரிபார்ப்பு தேவைப்படும் நிறுவனங்களுக்கு 15 நாட்கள் அவகாசம் வழங்கப்படுகிறது. இந்த செயல்முறை முடிந்ததும், அதிகாரிகள் 7 நாட்களுக்குள் விண்ணப்பத்தை பரிசீலிக்க வேண்டும் அல்லது சந்தேகங்களை எழுப்ப வேண்டும். ஸ்டார்ட்-அப்கள் மற்றும் டெலிகாம் நிறுவனங்களுக்கு இந்த மாற்றம் பெரும் வரப்பிரசாதமாக அமையும்.
சட்ட சிக்கல்களுக்கு முற்றுப்புள்ளி
இதுவரை வரி தொடர்பான நோட்டீஸ்கள் (Show Cause Notices) மிகவும் கடுமையான மொழியில் இருந்தன. இனி, அதிகாரிகள் உறுதியான ஆதாரங்கள் இல்லாமல் நோட்டீஸ் அனுப்பக் கூடாது என அறிவுறுத்தப்பட்டுள்ளது. மேலும், நோட்டீஸில் 'வரி பாக்கி இருக்கலாம்' (appears to be) என்ற ரீதியில் மட்டுமே குறிப்பிட வேண்டும். இது தேவையற்ற சட்டப் போராட்டங்களையும், நிறுவனங்களின் செலவுகளையும் பெருமளவு குறைக்கும்.
இந்த மாற்றம், இந்தியா முழுவதும் தொழில் செய்யும் நிறுவனங்களுக்கு நிர்வாக ரீதியான சுமையைக் குறைக்கும். ஜிஎஸ்டி விகிதங்களில் எந்த மாற்றமும் இல்லை என்றாலும், நடைமுறை சிக்கல்களைக் குறைப்பதன் மூலம் 'ஈஸ் ஆஃப் டூயிங் பிசினஸ்' (Ease of Doing Business) முன்னெடுப்பில் இது ஒரு முக்கிய மைல்கல்லாகக் கருதப்படுகிறது.