சர்வதேச ETF-கள் தற்போதைய சந்தை மதிப்பை (NAV) விட அதிக விலையில் வர்த்தகமாவது குறித்து BSE எச்சரிக்கை விடுத்துள்ளது. வெளிநாட்டு முதலீட்டு உச்சவரம்பு எட்டப்பட்டதால் புதிய யூனிட்கள் உருவாக்க முடியாததே இதற்கு முக்கிய காரணமாகும்.
மும்பை பங்குச் சந்தை (BSE), சர்வதேச அளவில் முதலீடு செய்யும் எக்ஸ்சேஞ்ச் டிரேடட் ஃபண்டுகளில் (ETF) முதலீடு செய்யும் முதலீட்டாளர்களுக்கு ஒரு முக்கிய எச்சரிக்கையை விடுத்துள்ளது. தற்போது பல சர்வதேச ETF-கள் அவற்றின் உண்மையான நிகர சொத்து மதிப்பான (NAV) அளவை விட அதிக விலையில் வர்த்தகம் செய்யப்படுகின்றன.
ஏன் இந்த விலை உயர்வு?
இந்திய மியூச்சுவல் ஃபண்ட் நிறுவனங்கள் வெளிநாட்டு முதலீடுகளுக்கான அனுமதிக்கப்பட்ட உச்சவரம்பை (Investment Limit) முழுமையாக எட்டிவிட்டன. இதனால், புதிய ETF யூனிட்களை உருவாக்க முடியாத சூழல் நிலவுகிறது. மார்க்கெட்டில் சப்ளை குறைவாகவும், முதலீட்டாளர்களின் தேவை அதிகமாகவும் இருப்பதால், யூனிட்களின் விலை செயற்கையாக உயர்ந்துள்ளது.
முதலீட்டாளர்கள் கவனத்திற்கு!
இந்த விலை ஏற்றம் என்பது அந்த ஃபண்டின் செயல்பாட்டினால் வருவதல்ல, மாறாக சப்ளை மற்றும் டிமாண்ட் காரணமாக ஏற்படும் ஒரு தற்காலிக சூழல். வெளிநாட்டு முதலீட்டு உச்சவரம்பு மாற்றப்பட்டாலோ அல்லது மார்க்கெட் சென்டிமென்ட் மாறினாலோ, இந்த கூடுதல் பிரீமியம் திடீரென சரிந்துவிடும். அப்படி நடக்கும்போது, அதிக விலையில் வாங்கிய முதலீட்டாளர்கள் பெரும் மூலதன இழப்பைச் சந்திக்க நேரிடும்.
செபியின் புதிய நடவடிக்கை
இந்த சிக்கலை சரிசெய்ய SEBI களத்தில் இறங்கியுள்ளது. 2026 ஜூன் மாதம் வெளியிடப்பட்ட வழிகாட்டுதலின்படி, 2027 ஏப்ரல் மாதத்திற்குள் புதிய பிரைஸ் பேண்ட் (Price Band) முறையை அமல்படுத்த திட்டமிடப்பட்டுள்ளது. இதன் மூலம், முந்தைய நாள் NAV விலையை அடிப்படையாகக் கொண்டு வர்த்தகம் நடைபெறும். இது தேவையற்ற விலை ஏற்றத்தைத் தடுக்கும்.
இப்போதைக்கு, முதலீட்டாளர்கள் எந்தவொரு ETF-ஐ வாங்கும் முன்பும் அதன் தற்போதைய NAV விலையை அந்தந்த ஃபண்ட் ஹவுஸ் அல்லது பங்குச் சந்தை இணையதளத்தில் சரிபார்த்துவிட்டு, கவனத்துடன் செயல்படுமாறு அறிவுறுத்தப்படுகிறார்கள்.