Indian Real Estate: 76% சரிந்த முதலீடுகள் - ரியல் எஸ்டேட் சந்தையில் நடப்பது என்ன?

ரியல் எஸ்டேட் சந்தையில் நிலவும் இந்த கடும் சரிவு, முதலீட்டு வியூகத்தில் ஏற்பட்டுள்ள பெரும் மாற்றத்தை காட்டுகிறது. கடந்த ஆண்டு இதே காலகட்டத்தில் $2.9 பில்லியன் டாலராக இருந்த முதலீடு, இப்போது $705 மில்லியன் டாலராக சுருங்கியுள்ளது. அதிக ரிஸ்க் நிறைந்த திட்டங்களை தவிர்த்து, நிலையான வருமானம் தரும் சொத்துக்களை நோக்கி முதலீட்டாளர்கள் நகர்ந்துள்ளனர்.

பிரைவேட் ஈக்விட்டியின் ஆதிக்கம்

மொத்த முதலீட்டில் 79% பங்களிப்பை பிரைவேட் ஈக்விட்டி (Private Equity) நிறுவனங்களே வழங்கியுள்ளன. இதில் குறிப்பிடத்தக்க விஷயம் என்னவென்றால், $50 மில்லியன் டாலருக்கும் அதிகமான மதிப்புள்ள நான்கு பெரிய டீல்கள் மட்டுமே மொத்த முதலீட்டில் 90%-ஐ பிடித்துள்ளன.

முக்கிய டீல்களை பொறுத்தவரை:

• Brookfield India Real Estate Trust: மும்பை பாந்த்ரா-குர்லா காம்ப்ளக்ஸில் அலுவலக சொத்தை $179 மில்லியன் டாலருக்கு வாங்கியுள்ளது.
• Nexus Select Trust: கவுகாத்தியில் சில்லறை மற்றும் விருந்தோம்பல் சொத்துக்களில் $168 மில்லியன் டாலரை முதலீடு செய்துள்ளது.

வருமானம் தரும் சொத்துக்களுக்கு முன்னுரிமை

வணிக ரீதியிலான சொத்துக்கள் (Commercial Real Estate) $371 மில்லியன் முதலீட்டை ஈட்டியுள்ளன. அதேபோல், குடியிருப்பு சார்ந்த திட்டங்களில் (Residential) $183 மில்லியன் முதலீடு செய்யப்பட்டுள்ளது. 2025-ல் ஐபிஓ (IPO) மற்றும் கியூஐபி (QIP) மூலம் $1 பில்லியன் டாலருக்கும் மேல் திரட்டிய பொதுச்சந்தை, இந்த காலாண்டில் மிக மெதுவாகவே செயல்பட்டுள்ளது. இந்த காலாண்டில் வெறும் 2 ஐபிஓ-க்கள் மட்டுமே வந்துள்ளன, அவை திரட்டிய தொகை வெறும் $59 மில்லியன் டாலர் மட்டுமே.

இணைப்பு மற்றும் கையகப்படுத்துதல் (M&A)

இணைப்பு மற்றும் கையகப்படுத்துதல் சந்தையில் மந்தநிலை நிலவுகிறது. மொத்தம் $92 மில்லியன் டாலர் மதிப்புள்ள டீல்கள் மட்டுமே நடந்துள்ளன. இதில் Aurum PropTech நிறுவனம், Housing.com-ன் தாய் நிறுவனமான Locon Solutions-ஐ வாங்கியது முக்கிய நிகழ்வாக பார்க்கப்படுகிறது. சந்தையில் நிலவும் இந்த எச்சரிக்கையான சூழல், தெளிவான லாபம் கிடைக்கும் வரை நீடிக்கவே அதிக வாய்ப்புள்ளது.