GIFT சிட்டியில் ரியல் எஸ்டேட் ஃபைனான்சிங்கை மேம்படுத்த, Mortgage REITs அறிமுகம் செய்ய IFSCA நிபுணர் கமிட்டி பரிந்துரைத்துள்ளது. இதன் மூலம், முதலீட்டு மூலதனத்தை ஈர்ப்பதும், உலகளாவிய முதலீட்டாளர்களை கவர்வதும் இதன் முக்கிய நோக்கங்கள்.
GIFT சிட்டியின் இன்டர்நேஷனல் ஃபைனான்சியல் சர்வீசஸ் சென்டரில் (IFSC) ரியல் எஸ்டேட் மற்றும் உள்கட்டமைப்பு ஃபைனான்சிங் துறையில் ஒரு பெரிய மாற்றத்தை கொண்டுவர, IFSCA-வின் நிபுணர் குழு ஒரு திட்டத்தை வெளியிட்டுள்ளது. முன்னாள் SEBI உறுப்பினர் அனந்த பரூவா தலைமையிலான இந்தக் குழு, புதிய முதலீட்டு வழிமுறைகளை அறிமுகப்படுத்துவதோடு, விதிமுறைகளை சீரமைப்பதன் மூலம் உள்நாட்டு மற்றும் வெளிநாட்டு மூலதனத்தை ஈர்க்க திட்டமிட்டுள்ளது.
Mortgage REITs அறிமுகம்
இந்த பரிந்துரைகளின் முக்கிய அம்சம், GIFT சிட்டியில் Mortgage REITs (mREITs) எனப்படும் புதிய முதலீட்டு முறையை அறிமுகப்படுத்துவதாகும். வழக்கமான REITs போலல்லாமல், இவை வணிக ரீதியான சொத்துக்களை சொந்தமாக்குவதற்கும் இயக்குவதற்கும் பதிலாக, முக்கியமாக அடமானப் பத்திரங்கள் (Mortgage-backed Securities) மற்றும் ரியல் எஸ்டேட் கடன்களுக்கான வட்டி மூலம் வருவாய் ஈட்டுகின்றன. இது முதலீட்டாளர்களுக்கு ஒருவித கடன் ஃபைனான்சிங் போன்றது. இதில், கடன் மூலம் பெற்ற நிதிக்கான செலவுக்கும், அடமான சொத்துக்களில் இருந்து பெறும் வட்டிக்கும் இடையிலான நிகர லாபம் (Net Interest Margin) முக்கியமானது.
மூலதனத்தை விடுவிக்கும் முயற்சி
வங்கிகள் மற்றும் NBFC-க்கள் தங்களது கடன் தொகுப்புகளை (Loan Books) Securitize செய்ய அனுமதிப்பதன் மூலம், நீண்ட கால ரியல் எஸ்டேட் கடன்களில் சிக்கியுள்ள மூலதனத்தை விடுவிக்க இந்த யோசனை உதவுகிறது.
முதலீட்டு வாய்ப்புகளை விரிவுபடுத்துதல்
மேலும், Green REITs மற்றும் Small and Medium REITs போன்ற பல்வேறு முதலீட்டு கருவிகளையும் குழு பரிந்துரைத்துள்ளது. 'Mixed' மற்றும் 'Global' REIT கட்டமைப்புகளை முன்மொழிவதன் மூலம், வெவ்வேறு நாடுகளில் உள்ள சொத்துக்களை ஒரே போர்ட்ஃபோலியோவில் ஒருங்கிணைக்க இது உதவும். இதனால் முதலீட்டாளர்களுக்கு அதிக பல்வகைப்படுத்தல் (Diversification) கிடைக்கும். அமெரிக்கா, ஆஸ்திரேலியா, இங்கிலாந்து போன்ற நிதி மையங்களில் இது ஏற்கனவே நடைமுறையில் உள்ளது.
ஒழுங்குமுறை மற்றும் வரி ஒருங்கிணைப்பு
மூலதனப் புழக்கத்தை (Liquidity) அதிகரிக்கவும், உலகளாவிய பங்கேற்பை அதிகரிக்கவும், SEBI-யில் பதிவுசெய்யப்பட்ட REITs மற்றும் InvITs-ஐ GIFT-IFSC பரிவர்த்தனை தளங்களில் டெபாசிட்டரி ரசீதுகள் (Depository Receipts) மூலமாகவோ அல்லது இரண்டாம் நிலை பட்டியல் (Secondary Listings) மூலமாகவோ பட்டியலிட பரிந்துரைக்கப்பட்டுள்ளது. இது இந்திய நிறுவனங்களுக்கு வெளிநாட்டு நிறுவனங்கள் மற்றும் வெளிநாட்டு வாழ் இந்திய முதலீட்டாளர்களை நேரடியாக அணுக உதவும்.
மேலும்,IFSCA மற்றும் SEBI-யில் பதிவுசெய்யப்பட்ட நிறுவனங்களுக்கு இடையே வரிச் சமநிலையை (Tax Parity) உறுதி செய்வது போன்ற முக்கிய வரி மற்றும் ஒழுங்குமுறை மாற்றங்களையும் குழு பரிந்துரைத்துள்ளது. வெளிநாட்டு முதலீடுகளில் இருந்து கிடைக்கும் வருமானம், வெளிநாட்டில் வசிக்கும் முதலீட்டாளர்களுக்கு வரி விலக்கு அளிக்கப்பட வேண்டும் என்றும், இது சில மாற்று முதலீட்டு நிதிகளுக்கு (Alternative Investment Funds) தற்போதுள்ள வரி விதிப்புக்கு இணையாக இருக்கும் என்றும் தெரிவிக்கப்பட்டுள்ளது. GIFT சிட்டியை உலகளாவிய முதலீடுகளுக்கான ஒரு தளமாகப் பயன்படுத்த விரும்பும் ஸ்பான்சர்களுக்கு இருக்கும் தடைகளை நீக்கும் வகையில், IFSC-ஐ தளமாகக் கொண்ட நிறுவனங்களின் இந்திய ஈக்விட்டிகளில் செய்யப்படும் முதலீடுகளுக்கான துறைசார் வரம்புகள் (Sectoral Caps) மற்றும் லாக்-இன் தேவைகளை தளர்த்தவும் குழு கோரியுள்ளது. இந்த பரிந்துரைகளின் இறுதி செயலாக்கம், IFSCA, நிதி அமைச்சகம் மற்றும் SEBI இடையேயான ஒத்துழைப்பு மற்றும் வருமான வரிச் சட்டத்தில் தேவையான திருத்தங்களைப் பொறுத்தது.