Tata Sons தனது செயல்பாட்டு கட்டமைப்பை மாற்றும் வகையில், முக்கிய இரண்டு பிசினஸ் யூனிட்களை ஒன்றாக இணைக்க முடிவு செய்துள்ளது. இதன் மூலம் RBI-ன் NBFC விதிமுறைகளில் இருந்து தப்பித்து, ஒரு 'Operating-cum-holding' கம்பெனியாக மாற திட்டமிட்டுள்ளது.
டாடா குழுமத்தின் ஹோல்டிங் நிறுவனமான Tata Sons Private Limited, தனது நிறுவனத்தின் அடையாளத்தை மாற்ற ஒரு பெரிய மறுசீரமைப்பு பணியில் இறங்கியுள்ளது. தற்போதுள்ள NBFC அல்லது Core Investment Company (CIC) என்ற கடுமையான கட்டுப்பாடுகளில் இருந்து தப்பிக்க, Tata Electronics Systems Solutions மற்றும் Tata Consulting Engineers ஆகிய இரு நிறுவனங்களை நேரடியாக தன்னுள் இணைக்க திட்டமிட்டுள்ளது.
வருவாய் இலக்கு என்ன?
2026 மார்ச் 31-க்குள், தனது செயல்பாட்டு வருவாயை (Operating revenue) ₹105,043 கோடி ஆக உயர்த்த நிறுவனம் இலக்கு நிர்ணயித்துள்ளது. தனது மொத்த வருவாயில் 64 சதவீதத்திற்கும் மேல் செயல்பாட்டு வருவாயாக இருந்தால் மட்டுமே, இந்த CIC கட்டுப்பாடுகளில் இருந்து வெளியேற முடியும்.
முதலீட்டு கட்டுப்பாடு
இந்த புதிய திட்டத்தின்படி, குழும நிறுவனங்களில் செய்யப்படும் முதலீட்டை ₹177,120 கோடி ஆக கட்டுப்படுத்த திட்டமிடப்பட்டுள்ளது. இது நிறுவனத்தின் நிகர சொத்து மதிப்பீடான (Net assets) ₹200,158 கோடியில் 90 சதவீதத்திற்கும் குறைவாக இருக்க வேண்டும் என்பது விதியாகும்.
இந்த திட்டத்திற்கு ஏற்கனவே Sir Dorabji Tata Trust மற்றும் Sir Ratan Tata Trust ஆகியவை ஜூலை 2025-ல் ஒப்புதல் அளித்துவிட்டன. இனி RBI-ன் தடையில்லா சான்றிதழ் (NOC) கிடைத்தால், Tata Sons தனது தற்போதைய CIC உரிமத்தை திரும்ப ஒப்படைக்கும். இதன் மூலம், டாடா குழுமம் தனது அன்லிஸ்டட் (Unlisted) அந்தஸ்தையும், நிர்வாக சுதந்திரத்தையும் தொடர்ந்து தக்கவைக்க முடியும்.