வங்கிகள் மற்றும் நிதி நிறுவனங்கள் ஒரு சில குறிப்பிட்ட Cloud மற்றும் தொழில்நுட்ப நிறுவனங்களை மட்டுமே சார்ந்து இருப்பது மிகப்பெரிய அபாயம் என ரிசர்வ் வங்கி (RBI) எச்சரித்துள்ளது. இந்த கட்டுப்பாடுகளால் வங்கிகளின் IT செலவுகள் அதிகரிக்க வாய்ப்புள்ளது.
மும்பையில் நடைபெற்ற 'குளோபல் பின்டெக் ஃபெஸ்ட்' (Global Fintech Fest) நிகழ்ச்சியில் பேசிய ரிசர்வ் வங்கி துணை ஆளுநர் ரோகித் ஜெயின், நிதித்துறை எதிர்கொள்ளும் புதிய சவால்கள் குறித்து அதிர்ச்சிகரமான தகவல்களைப் பகிர்ந்துள்ளார்.
'கான்சென்ட்ரேஷன் ரிஸ்க்' (Concentration Risk)
தற்போது பெரும்பாலான வங்கிகள் மற்றும் நிதி நிறுவனங்கள் (NBFCs), கிளவுட் ஸ்டோரேஜ், டேட்டா புராசஸிங் மற்றும் AI அனலிட்டிக்ஸ் போன்ற முக்கியமான பணிகளுக்கு ஒரு சில குறிப்பிட்ட தொழில்நுட்ப நிறுவனங்களையே நாடுகின்றன. ஒருவேளை இந்த ஒரு நிறுவனத்தில் சிறிய தொழில்நுட்பக் கோளாறு ஏற்பட்டால் கூட, அது ஒட்டுமொத்த வங்கித்துறையையும் பாதிக்கும் அபாயம் இருப்பதாக RBI சுட்டிக்காட்டியுள்ளது.
AI மற்றும் வேகமான பரிவர்த்தனைகள்
செயற்கை நுண்ணறிவு (AI) மற்றும் டோக்கனைசேஷன் முறைகள் நிதித்துறைக்கு வேகத்தை அளித்தாலும், அதன் 'ஒபேசிட்டி' (Opacity) அல்லது முடிவெடுக்கும் விதம் மர்மமாக இருப்பது பெரும் சிக்கல். ஒரு தவறு நடந்தால் அதை மனிதர்களால் கட்டுப்படுத்துவதற்குள், சிஸ்டம் விபரீதத்தை ஏற்படுத்திவிடும் என்பது ரிசர்வ் வங்கியின் அச்சம்.
பொறுப்பு யாருடையது?
எந்தவொரு தொழில்நுட்பப் பணியையும் மூன்றாம் தரப்பு நிறுவனத்திடம் ஒப்படைத்தாலும், அதற்குரிய முழுப் பொறுப்பும் அந்த வங்கிக்குத்தான் உண்டு. தொழில்நுட்பக் கோளாறு என்று கூறி வங்கிகள் தப்பிக்க முடியாது என RBI திட்டவட்டமாகத் தெரிவித்துள்ளது.
முதலீட்டாளர்கள் என்ன செய்ய வேண்டும்?
RBI-ன் இந்த எச்சரிக்கையைத் தொடர்ந்து, வங்கிகள் தங்களது தொழில்நுட்ப கட்டமைப்பில் பல மாற்றங்களைச் செய்ய வேண்டியிருக்கும். மல்டி-கிளவுட் (Multi-cloud) உத்திகள் மற்றும் கூடுதல் பாதுகாப்பு வசதிகளை உருவாக்குவது வங்கிகளின் லாபத்தில் (Profit margin) ஒரு பகுதியை செலவாக மாற்றக்கூடும். இனிவரும் காலாண்டு முடிவுகளில் வங்கிகளின் IT செலவுகள் மற்றும் ரிஸ்க் மேனேஜ்மென்ட் திட்டங்கள் குறித்து நிர்வாகம் தரும் விளக்கங்களை முதலீட்டாளர்கள் உன்னிப்பாகக் கவனிக்க வேண்டும்.