இந்திய ரிசர்வ் வங்கி (RBI) அதிரடி அறிவிப்பை வெளியிட்டுள்ளது. ஜனவரி 1, 2026 முதல், தனிநபர்கள் வாங்கும் ஃப்ளோட்டிங் ரேட் கடன்களுக்கு (Floating Rate Loans) முன்செலுத்தல் கட்டணம் (Prepayment Charges) வசூலிக்கக் கூடாது என அனைத்து வங்கிகளுக்கும் உத்தரவிட்டுள்ளது. இதனால், கடனை முன்கூட்டியே அடைக்க நினைப்பவர்களுக்கு இனி கூடுதல் செலவு இல்லை.
ஃப்ளோட்டிங் ரேட் கடன்களுக்கு மட்டும்
RBI-யின் இந்த புதிய விதிமுறை, தனிநபர்கள் தனிப்பட்ட பயன்பாட்டுக்காக வாங்கும் ஃப்ளோட்டிங் ரேட் கடன்களுக்கு மட்டுமே பொருந்தும். அதாவது, கடனின் வட்டி விகிதம் சந்தை நிலவரத்திற்கேற்ப மாறும் வகையிலான கடன்களுக்குத்தான் இந்த சலுகை.
ஜனவரி 1, 2026 அன்று அல்லது அதற்குப் பிறகு வழங்கப்படும் அல்லது புதுப்பிக்கப்படும் ஃப்ளோட்டிங் ரேட் கடன்களுக்கு இது அமலுக்கு வரும். ஆனால், ஃபிக்ஸட் ரேட் கடன்களுக்கு (Fixed Rate Loans) இந்த விதிமுறை பொருந்தாது. ஃபிக்ஸட் ரேட் கடன்களைப் பொறுத்தவரை, வங்கிகள் தங்களுடைய ஒப்பந்த விதிமுறைகளின்படி முன்செலுத்தல் கட்டணங்களை வசூலிக்கலாம்.
வெளிப்படைத்தன்மை முக்கியம்
இந்த அறிவிப்பின் மூலம், கடனை முன்கூட்டியே அடைக்க விரும்பும் தனிநபர்கள், இனி எந்தவிதமான அபராதக் கட்டணங்களும் இன்றி அதைச் செய்ய முடியும். இது நிதிச்சுமையிலிருந்து விடுபடவும், வட்டிச் செலவைக் குறைக்கவும் பெரிதும் உதவும்.
மேலும், கடன் வழங்கும் வங்கிகள், வாடிக்கையாளர்களுக்கு வழங்கப்படும் 'Key Fact Statement' மற்றும் கடன் ஒப்பந்தக் கடிதத்தில் (Sanction Letter) முன்செலுத்தல் கட்டணம் குறித்த விவரங்களை தெளிவாகக் குறிப்பிட வேண்டும் என்றும் RBI வலியுறுத்தியுள்ளது. இதனால், கடனைப் பெறுவதற்கு முன்பே அதன் விதிமுறைகளை வாடிக்கையாளர்கள் தெளிவாகப் புரிந்துகொள்ள முடியும்.
என்ன செய்ய வேண்டும்?
ஃபிக்ஸட் ரேட் கடன் வாங்கியவர்கள், தங்கள் கடன் ஒப்பந்தத்தை ஒருமுறை சரிபார்ப்பது அவசியம். உங்கள் கடன் ஃப்ளோட்டிங் ரேட் வகையைச் சேர்ந்ததா அல்லது ஃபிக்ஸட் ரேட் வகையைச் சேர்ந்ததா என்பதை உறுதிப்படுத்திக் கொள்ளுங்கள். ஃப்ளோட்டிங் ரேட் கடனாக இருந்தால், ஜனவரி 1, 2026 முதல் நீங்கள் கட்டணம் செலுத்தத் தேவையில்லை. இருப்பினும், கடனை முழுமையாக அடைப்பதற்கு முன், வங்கியிடமிருந்து 'No Dues Certificate' அல்லது கடன் முடிவடைந்ததற்கான சான்றிதழைப் பெற்றுக்கொள்வது நல்லது. இது எதிர்காலத்தில் எழும் பிரச்சனைகளைத் தவிர்க்க உதவும்.