டிஜிட்டல் நிதித்துறையில் முக்கிய மாற்றத்தை கொண்டு வந்துள்ளது RBI. இனி அனைத்து Account Aggregator (AA) பிளாட்பார்ம்களும் ஒன்றோடொன்று இணைந்து செயல்பட வேண்டும் (Interoperability) என கட்டாயப்படுத்தியுள்ளது. இது கடன் பெறுபவர்களுக்கும், நிதி நிறுவனங்களுக்கும் இடையிலான தரவுப் பரிமாற்றத்தை இனி மிகவும் எளிதாக்கும்.
2021-ல் அறிமுகப்படுத்தப்பட்ட Account Aggregator (AA) கட்டமைப்பில், இதுவரை பிளாட்பார்ம்கள் தனித்தனியாகச் செயல்பட்டு வந்தன. தற்போது, RBI கொண்டு வந்துள்ள இந்த புதிய கட்டாய விதிமுறை மூலம், வாடிக்கையாளர்களின் நிதித் தரவுகளை (Bank statements, Investment portfolios) எந்தவொரு தடையும் இன்றி எந்தவொரு பிளாட்பார்மிலும் பகிர்ந்து கொள்ள முடியும்.
டிஜிட்டல் கடன் சந்தையில் பெரும் வளர்ச்சி
இந்த மாற்றத்தின் நோக்கம் டிஜிட்டல் கடன் வழங்கும் முறையை வேகப்படுத்துவதாகும். ஏற்கனவே 2026 நிதியாண்டின் இறுதிக்குள், இந்த AA நெட்வொர்க் மூலம் சுமார் ₹3.82 லட்சம் கோடி கடன் விநியோகம் செய்யப்பட்டுள்ளது. தற்போது இந்தியாவில் 17 பதிவுசெய்யப்பட்ட அகரிகேட்டர்கள் மற்றும் சுமார் 1,000 நிதி நிறுவனங்கள் இந்த அமைப்பில் உள்ளன. இனி ஆவணங்களைச் சரிபார்க்கும் நேரம் பெருமளவு குறையும், இதனால் கடன் வழங்குவது நிறுவனங்களுக்கு எளிதாகும்.
போட்டி மற்றும் தொழில்நுட்ப முன்னேற்றம்
முன்பெல்லாம், வங்கிகள் மற்றும் நிதி நிறுவனங்கள் ஒரு குறிப்பிட்ட அகரிகேட்டரை மட்டுமே நம்பி இருந்தன (Vendor lock-in). இந்த புதிய விதிமுறையால், அந்த நிலை மாறி, அனைத்து நிறுவனங்களும் சமமான தளத்தில் போட்டியிட வேண்டியிருக்கும். இதனால் பிளாட்பார்ம்கள் சேவைத் தரம் மற்றும் தொழில்நுட்ப மேம்பாட்டில் அதிக கவனம் செலுத்தும்.
பாதுகாப்பு மற்றும் சவால்கள்
தரவுகள் ஒரே நெட்வொர்க்கில் பகிரப்படுவதால், சைபர் பாதுகாப்பு மற்றும் தரவுத் தனியுரிமை (Data Privacy) இனி மிக முக்கியமாகப் பார்க்கப்படும். இந்தத் தொழில்நுட்ப மாற்றத்தை நிறுவனங்கள் எவ்வளவு விரைவாக அமல்படுத்துகின்றன என்பதில்தான் ஒட்டுமொத்த டிஜிட்டல் கடன் சந்தையின் எதிர்கால வெற்றியும் அடங்கியுள்ளது.