RBI அதிரடி உத்தரவு: இனி வங்கிக் கணக்குகளும் இனி ஒரே ஸ்டேட்மென்ட்டில்!

இந்திய ரிசர்வ் வங்கி (RBI) தனிநபர் நிதித் தரவுகளைக் கையாளும் முறையில் ஒரு முக்கிய மாற்றத்தைக் கொண்டு வந்துள்ளது. பங்குச் சந்தை முதலீடுகளுக்கு மட்டுமே பயன்பட்டு வந்த Consolidated Account Statements-ஐ (CAS), இனி வங்கி டெபாசிட்களையும் உள்ளடக்கிய முழுமையான 'நிதி டேஷ்போர்டாக' மாற்ற RBI திட்டமிட்டுள்ளது. இந்த புதிய நடைமுறை டிசம்பர் 31, 2026-க்குள் செயல்பாட்டிற்கு வர வேண்டும் என உத்தரவிடப்பட்டுள்ளது.

ஒரே இடத்தில் மொத்த சொத்து மதிப்பு

இதுவரை முதலீட்டாளர்கள் தங்கள் பங்குச் சந்தை முதலீடுகளை ஒரு இடத்திலும் (Demat), வங்கிக் கணக்குகளை வேறு இடத்திலும் பார்க்க வேண்டியிருந்தது. இனி இந்த குழப்பத்திற்கு முற்றுப்புள்ளி வைக்கப்படுகிறது. உங்கள் சேமிப்புக் கணக்குகள் முதல் ஃபிக்ஸட் டெபாசிட்டுகள் வரை அனைத்தையும் ஒரே அறிக்கையில் பார்ப்பதன் மூலம், வரி தாக்கல் செய்வது (Tax filing) மற்றும் நாமினி விவரங்களைச் சரிபார்ப்பது மிகவும் எளிதாகும். நீண்ட நாட்களாகப் பயன்படுத்தப்படாத கணக்குகளைக் கண்டறியவும் இது உதவும்.

Account Aggregator-ன் பங்கு

இந்தத் திட்டம் 'Account Aggregator' (AA) கட்டமைப்பின் கீழ் இயங்குகிறது. இது பயனர்களின் அனுமதியுடன் பாதுகாப்பாகத் தகவல்களைப் பகிர வழிவகுக்கிறது. பல்வேறு NBFC-Account Aggregator-களுக்கு இடையே ஒருங்கிணைப்பு (Interoperability) இருக்க வேண்டும் என்றும் RBI கட்டாயப்படுத்தியுள்ளது. இதன் மூலம், ஒரு குறிப்பிட்ட நிறுவனத்தை மட்டுமே சார்ந்து இருக்க வேண்டிய கட்டாயம் இனி முதலீட்டாளர்களுக்கு இல்லை.

பாதுகாப்பு மற்றும் சவால்கள்

முதலீட்டாளர்களின் முக்கிய நிதித் தகவல்கள் பரிமாறப்படுவதால், தரவுப் பாதுகாப்பு (Data Privacy) மற்றும் என்க்ரிப்ஷன் (Encryption) முறையில் ரிசர்வ் வங்கி அதிக கவனம் செலுத்தி வருகிறது. எந்தெந்த வகை டெபாசிட்டுகள் (Savings vs Recurring/Fixed) இதில் இடம்பெறும் என்பது குறித்த விரிவான வழிகாட்டுதல்களை RBI விரைவில் வெளியிடும் என்று எதிர்பார்க்கப்படுகிறது.