FAST-DS திட்டம்: வெளிநாட்டு சொத்துக்களை மறைத்திருந்தால் சிக்கல் தான்! டிசம்பர் 31, 2026-க்குள் அறிவிக்க கெடு

வருமான வரித்துறை தற்போது வெளிநாட்டில் உள்ள சொத்துக்கள் மற்றும் நிதி சார்ந்த விவரங்களை முறையாகத் தாக்கல் செய்ய ஒரு முக்கிய வாய்ப்பை வழங்கியுள்ளது. FAST-DS (Foreign Asset of Small Taxpayers-Disclosure Scheme) என்ற இந்தத் திட்டத்தின் மூலம், இதுவரை அறிவிக்கப்படாத வெளிநாட்டு முதலீடுகள் மற்றும் கணக்குகளை வெளிப்படையாகத் தெரிவிக்கலாம். இதற்கு டிசம்பர் 31, 2026 என்பது இறுதித் தேதியாக நிர்ணயிக்கப்பட்டுள்ளது.

ஏன் இந்த நடவடிக்கை?

உலக நாடுகளுடனான நிதித் தகவல் பரிமாற்ற ஒப்பந்தங்களான CRS மற்றும் AEOI ஆகியவற்றின் கீழ், வெளிநாடுகளில் இந்தியர்கள் வைத்திருக்கும் வங்கிக் கணக்குகள் மற்றும் முதலீடுகள் குறித்த தகவல்கள் இந்திய அரசுக்கு நேரடியாக வந்து சேர்கின்றன. எனவே, உங்கள் தகவல்களை நீங்கள் மறைத்தாலும், வருமான வரித்துறையிடம் ஏற்கனவே அது குறித்த தரவுகள் இருக்க அதிக வாய்ப்புள்ளது. இந்த முரண்பாடுகளைச் சரிசெய்யவே இந்தத் திட்டம் கொண்டுவரப்பட்டுள்ளது.

எப்படிச் சரிபார்ப்பது?

வரி செலுத்துவோர் தங்களின் வருமான வரித்துறை இ-ஃபைலிங் போர்ட்டலில் உள்ள AIS (Annual Information Statement) பகுதிக்குச் சென்று, அதில் உள்ள 'Foreign Assets Information' என்ற பிரிவைச் சரிபார்க்க வேண்டும். அதில் ஏதேனும் விடுபட்ட முதலீடுகள் அல்லது வருமானம் (Interest, Dividend, Capital Gains) இருந்தால், அவற்றை Schedule FA படிவத்தில் உடனே சேர்க்க வேண்டும்.

கவனிக்க வேண்டியவை:

இந்தத் திட்டம் கருணைத் திட்டம் (Amnesty Scheme) அல்ல; இது வரி இணக்கத்தை (Compliance) உறுதி செய்வதற்கான ஒரு வாய்ப்பு மட்டுமே. Black Money Act, 2015 சட்டத்தின்படி, வெளிநாட்டு சொத்துக்களை மறைப்பது கடுமையான அபராதங்களுக்கு வழிவகுக்கும். பழைய அல்லது செயலிழந்து போன கணக்குகள் குறித்து ஏதேனும் தொழில்நுட்பச் சிக்கல்கள் இருந்தால், இ-ஃபைலிங் போர்ட்டலில் உள்ள 'Kar Saathi' உதவி மையத்தைத் தொடர்பு கொள்ளலாம்.