பல கிரெடிட் கார்டு பயனர்கள் 45 நாட்கள் வட்டி இல்லா காலத்தை ஒரு நிலையான சலுகை என நினைக்கிறார்கள். ஆனால், இது உங்கள் பில்லிங் சுழற்சியைப் பொறுத்து மாறுபடும் ஒரு தற்காலிக வசதி மட்டுமே.
பில்லிங் சுழற்சி (Billing Cycle) எப்படி வேலை செய்கிறது?
பொதுவாக கிரெடிட் கார்டில் ஒரு பொருள் வாங்கினால், அதற்கு உடனே வட்டி வராது என்று பலரும் நம்புகின்றனர். இது ஒரு தவறு. நீங்கள் ஒரு பொருளை வாங்கும் தேதிக்கும், உங்கள் பில் செலுத்தும் கடைசி தேதிக்கும் (Due Date) இடைப்பட்ட காலமே இந்த வட்டி இல்லா காலம்.
நீங்கள் ஸ்டேட்மெண்ட் ஜெனரேட் ஆன மறுநாளே ஒரு பொருளை வாங்கினால், உங்களுக்கு 45 முதல் 55 நாட்கள் வரை அவகாசம் கிடைக்கலாம். ஆனால், பில்லிங் தேதி முடிவதற்கு சில நாட்களுக்கு முன்பு வாங்கினால், வெறும் 18 முதல் 20 நாட்கள் மட்டுமே வட்டி இல்லா காலம் கிடைக்கும்.
'Minimum Amount' கட்டினால் வட்டி வராதா?
இதுதான் பலருக்கும் இருக்கும் மிகப்பெரிய சந்தேகம். 'மினிமம் அமௌன்ட்' (Minimum Amount Due) கட்டினால் போதும், வட்டி வராது என்று பலரும் தவறாக நினைக்கிறார்கள். ஆனால், ரிசர்வ் வங்கி (RBI) விதிகள் மற்றும் வங்கி நடைமுறைகளின்படி, நீங்கள் மொத்தத் தொகையையும் (Total Outstanding) செலுத்தினால் மட்டுமே வட்டி இல்லா சலுகை கிடைக்கும்.
நீங்கள் குறைந்தபட்ச தொகையை மட்டும் செலுத்தினால், வங்கி மீதமுள்ள தொகைக்கு ஒவ்வொரு பரிவர்த்தனை நடந்த தேதியிலிருந்தே வட்டி கணக்கிடத் தொடங்கும். இது கடன் சுமையை மிக வேகமாக அதிகரிக்கும்.
கவனித்துச் செயல்படுங்கள்!
முக்கியமாக, ஏடிஎம்மில் பணம் எடுக்கும் (Cash Advance) பரிவர்த்தனைகளுக்கு இந்த வட்டி இல்லா காலம் பொருந்தாது என்பதை நினைவில் கொள்ளுங்கள். எடுத்த அன்றே வட்டி கணக்கிடப்படும். எனவே, உங்கள் கார்டின் விதிமுறைகளை அவ்வப்போது சரிபார்ப்பதும், பில் தொகையை முழுமையாகச் செலுத்துவதும் மட்டுமே கடன் வலையில் சிக்காமல் இருக்க ஒரே வழி.