நிறுவனம் பங்குச்சந்தையிலிருந்து நீக்கப்பட்ட (Delisted) உடனே அந்த நஷ்டத்தை வருமான வரியின் கீழ் காட்ட முடியாது. பங்குகளை விற்பனை செய்யும் வரை அல்லது அவை முற்றிலும் நீக்கப்படும் வரை எந்த ஒரு வரி சலுகையும் கிடைக்காது. இதை சரியாக கையாள்வது எப்படி என்பதைப் பார்ப்போம்.
பங்குச்சந்தையிலிருந்து ஒரு கம்பெனி நீக்கப்படும்போது (Delisting), பங்கின் விலை குறைவதை வைத்தே முதலீட்டாளர்கள் அதை நஷ்டமாகக் கருதி, வருமான வரி தாக்கல் செய்யும் போது அதை கழித்து விடுகிறார்கள். ஆனால், இந்திய வருமான வரி சட்டத்தின்படி, இது ஒரு தவறான புரிதல். உங்கள் டீமேட் கணக்கில் பங்குகள் இருக்கும் வரை, அது உங்கள் சொத்தாகவே கருதப்படுகிறது. வெறும் டிலிஸ்டிங் மட்டுமே ஒரு 'வரி நிகழ்வு' (Taxable Event) ஆகாது.
எப்போது நஷ்டத்தை கிளைம் செய்யலாம்?
நீங்கள் சட்டப்பூர்வமாக நஷ்டத்தை காட்ட வேண்டுமென்றால், அந்த பங்குகள் உங்கள் வசம் இருக்கக்கூடாது. அதாவது:
- Off-market sale: அந்த பங்குகளை வேறு ஒருவருக்கு நேரடியாக விற்பனை செய்வது.
- Exit offer/Buyback: கம்பெனி அறிவிக்கும் வெளியேற்றத் திட்டத்தில் பங்குகளை ஒப்படைப்பது.
- Liquidation: கம்பெனி மூடப்பட்டு பங்குகள் ரத்து செய்யப்படும் பட்சத்தில்.
இந்த செயல்கள் நடந்தால் மட்டுமே, அதை ஒரு டிரான்ஸ்பர் ஆகக் கருதி, நஷ்டத்தை வருமான வரி கணக்கில் காட்ட முடியும்.
அன்லிஸ்டட் (Unlisted) பங்குகள் விதிமுறை
பங்குகள் லிஸ்டட் ஆக இருந்தபோது, 12 மாதங்களுக்கு மேல் வைத்திருந்தால் அதை நீண்டகால முதலீடாகக் கருதினோம். ஆனால், அவை டிலிஸ்ட் ஆன பிறகு 'அன்லிஸ்டட்' பங்காக மாறிவிடுகின்றன. இப்போது நீண்டகால ஆதாய வரி (LTCG) சலுகை பெற, நீங்கள் அந்த பங்குகளை குறைந்தபட்சம் 24 மாதங்கள் வைத்திருக்க வேண்டும். வரி கணக்கிடும்போது இந்த கால அளவு மாற்றத்தை கவனத்தில் கொள்வது அவசியம்.
கவனத்தில் கொள்ள வேண்டியவை
வருமான வரி தாக்கல் செய்யும்போது (ITR), அன்லிஸ்டட் ஷேர்களை முறையாக வெளிப்படுத்த வேண்டும். முறையான ஆவணங்கள் இல்லாமல் நஷ்டத்தை காட்டினால், வருமான வரித் துறையிடமிருந்து நோட்டீஸ் வர வாய்ப்புள்ளது. மேலும், இந்த நஷ்டத்தை அடுத்தடுத்த ஆண்டுகளுக்கு கொண்டு செல்ல (Carry forward) வேண்டுமென்றால், சரியான நேரத்தில் ஐடிஆர் தாக்கல் செய்வது கட்டாயமாகும்.