பரிசாகக் கிடைத்த நகைகளை விற்று வீடு வாங்கப் போகிறீர்களா? நீங்கள் கட்டாயம் கவனிக்க வேண்டிய வரி விதிகள்!

பலர் தங்களுக்குத் திருமணத்திலோ அல்லது குடும்பத்திலோ பரிசாகக் கிடைத்த நகைகளை விற்கும்போது வரி இருக்காது என்று நினைக்கிறார்கள். ஆனால், வருமான வரிச் சட்டத்தின்படி, இந்த விற்பனை ஒரு 'டேக்ஸபிள் ஈவென்ட்' (Taxable Event) ஆகும்.

கணக்கீட்டு சிக்கல் (Calculation Trap)

பலரும் செய்யும் முக்கியத் தவறு, நகையைத் தங்களுக்குக் கிடைத்த விலையில் கணக்கிடுவதுதான். ஆனால், சட்டப்படி நகையின் ஆரம்ப விலை என்பது, அந்த நகையை முதலில் வாங்கிய நபர் கொடுத்த தொகையே. ஒரிஜினல் பில் உங்களிடம் இல்லை என்றால், அதிகாரிகள் இந்த செலவை 'Nil' (பூஜ்யம்) என்று கருதலாம், இதனால் விற்கப்படும் மொத்தத் தொகையுமே லாபமாகக் கருதப்பட்டு வரி விதிக்கப்படலாம்.

அதேபோல், ஹோல்டிங் பீரியட் (Holding Period) கணக்கிடும்போது, நீங்கள் வைத்திருக்கும் காலத்துடன், நகையை உங்களுக்கு வழங்கியவர் வைத்திருந்த காலத்தையும் சேர்த்தே கணக்கிட வேண்டும். இந்த கூட்டுக்காலம் 24 மாதங்களுக்குக் குறைவாக இருந்தால், அது ஷார்ட்-டேர்ம் கேபிடல் கெய்ன்ஸ் என உங்கள் வருமான வரி ஸ்லாப் படி வரி விதிக்கப்படும். 24 மாதங்களுக்கு மேல் இருந்தால், அது லாங்-டேர்ம் கேபிடல் கெய்ன்ஸ் என 12.5% வரி விதிக்கப்படும்.

பிரிவு 54F மூலம் வரி விலக்கு!

நகையை விற்ற பணத்தை வீடு வாங்கப் பயன்படுத்தினால், வருமான வரிச் சட்டத்தின் பிரிவு 54F-ன் கீழ் வரி விலக்கு கோரலாம். நகையை விற்றதற்கு ஓராண்டுக்கு முன்போ அல்லது இரண்டு ஆண்டுகளுக்குப் பிறகோ வீடு வாங்கினால் இந்த விலக்கு பொருந்தும். ஆனால், ஏற்கனவே ஒன்றுக்கும் மேற்பட்ட வீடு வைத்திருந்தால் இந்த சலுகை கிடைக்காது.

முக்கிய ஆவணங்கள்

வரி சிக்கல்களைத் தவிர்க்க, நகையை வழங்கியவரின் ஒரிஜினல் பில்கள் மற்றும் கிஃப்ட் டீட் (Gift Deed) ஆகியவற்றை பத்திரமாக வைத்திருக்க வேண்டியது அவசியம். சரியான ஆவணங்கள் இல்லையெனில், நீங்கள் அதிக வரி செலுத்த வேண்டிய சூழல் உருவாகலாம். எனவே, பெரிய முதலீட்டுக்குச் செல்லும் முன் வரி நிபுணர்களை அணுகி முறையான கணக்கீடுகளை மேற்கொள்வது நல்லது.