பழைய பிஸிக்கல் ஷேர் சான்றிதழ்களை டிமேட் கணக்கிற்கு மாற்ற SEBI ஒரு சிறப்பு வாய்ப்பை வழங்கியுள்ளது. பிப்ரவரி 5, 2026 முதல் பிப்ரவரி 4, 2027 வரை இந்த ஒரு வருட கால அவகாசத்தில் முதலீட்டாளர்கள் தங்கள் சிக்கலான பழைய ஷேர்களை முறைப்படுத்திக்கொள்ளலாம்.
2019 ஏப்ரல் 1-க்கு முன் பிஸிக்கல் வடிவில் ஷேர்களை வாங்கி, ஏதோ ஒரு காரணத்தால் அவற்றை டிமேட் செய்ய முடியாமல் தவித்த முதலீட்டாளர்களுக்கு இது ஒரு முக்கிய திருப்பம். SEBI அறிவித்துள்ள இந்த புதிய விதியின்படி, பிப்ரவரி 5, 2026 முதல் பிப்ரவரி 4, 2027 வரையிலான காலகட்டத்தில் மட்டுமே இந்த மாற்றங்களை மேற்கொள்ள முடியும்.
தகுதிகள் என்ன?
இது அனைத்து பிஸிக்கல் ஷேர்களுக்கும் பொருந்தாது. உங்கள் ஷேர் மாற்றத்திற்கான ஆவணங்கள் (Transfer Deed) ஏப்ரல் 1, 2019-க்கு முன்பே தயாரிக்கப்பட்டிருக்க வேண்டும். வெறும் ஷேர் சர்டிபிகேட் கையில் இருந்தால் மட்டும் போதாது, முறையான ஆவணங்களும் உங்களிடம் இருக்க வேண்டும். ஆவணங்கள் சேதமடைந்திருந்தாலோ அல்லது பெயர்களில் மாற்றங்கள் இருந்தாலோ கூடுதல் சரிபார்ப்பு நடவடிக்கைகள் தேவைப்படும்.
ஒரு வருட லாக்-இன் (Lock-in Period)
டிமேட் கணக்கிற்கு ஷேர்கள் வந்தவுடன், அவற்றை உடனே விற்க முடியாது. மாற்றப்பட்ட தேதியிலிருந்து 1 வருடம் வரை அந்த ஷேர்களை விற்கவோ, அடமானம் வைக்கவோ அல்லது வேறு எதற்கும் பயன்படுத்தவோ முடியாது. முறைகேடுகளைத் தடுக்கவும், ஊக வணிகத்தை தவிர்க்கவும் இந்த கட்டுப்பாடு விதிக்கப்பட்டுள்ளது.
செயல்முறை எப்படி?
இதற்கு நீங்கள் உங்கள் டெபாசிட்டரி பார்ட்டிசிபண்ட் (Depository Participant) உடன் இணைந்து செயல்பட வேண்டும். டிமெட்டீரியலைசேஷன் கோரிக்கைப் படிவம் (DRF), ஒரிஜினல் சர்டிபிகேட் மற்றும் பழைய ட்ரான்ஸ்பர் டீட் ஆகியவற்றை சமர்ப்பிக்க வேண்டும். ஒருவேளை பங்குதாரர் காலமானார் என்றால், வாரிசுதாரர்கள் மூலம் ஷேர்களை டிரான்ஸ்மிஷன் செய்த பிறகுதான் இந்த டிமேட் மாற்றத்தை செய்ய முடியும்.
முதலீட்டாளர்கள் தற்போதைய சூழலில், அந்த குறிப்பிட்ட நிறுவனம் பெயரை மாற்றியுள்ளதா அல்லது அதன் ரிஜிஸ்ட்ரார் மாறியுள்ளதா என்பதை அந்தந்த நிறுவனத்தின் இணையதளத்தில் சரிபார்த்துக்கொள்வது அவசியமாகும்.