Health Insurance: உங்கள் நிறுவனத்தின் இன்சூரன்ஸை மட்டும் நம்பியிருக்கிறீர்களா? இது ஆபத்தான முடிவு!

நிறுவனம் வழங்கும் ஹெல்த் இன்சூரன்ஸ் ஒரு கூடுதல் சலுகை மட்டுமே. அதை மட்டுமே முழுமையான பாதுகாப்பாகக் கருதுவது பெரும் நிதிச் சிக்கலில் கொண்டு போய் விடும். நீங்கள் வேலையை விட்டு விலகினால் அல்லது நிறுவனம் பாலிசியை ரத்து செய்தால், அடுத்த நொடியே உங்களின் மருத்துவக் காப்பீடு முடிவுக்கு வந்துவிடும்.

பிரீ-எக்சிஸ்டிங் டிசீஸ் (Pre-existing Diseases) சிக்கல்

ஒருவர் வேலையில் இருக்கும்போது ஏதேனும் உடல்நலப் பாதிப்பு ஏற்பட்டால், புதிய இன்சூரன்ஸ் எடுக்கும்போது அது 'பழைய நோய்' (Pre-existing disease) எனக் கருதப்படும். இதனால் பாலிசி பிரீமியம் 30% முதல் 50% வரை அதிகரிக்கலாம் அல்லது குறிப்பிட்ட காலம் வரை சிகிச்சைக்கான காப்பீடு கிடைக்காமல் போக வாய்ப்புள்ளது.

குரூப் பாலிசியின் குறைபாடுகள்

நிறுவனங்கள் வழங்கும் பாலிசிகள் பொதுவாக அனைவருக்குமான பொதுவான அம்சங்களைக் கொண்டவை. இதில் 'சம் இன்சூர்டு' (Sum Insured) அளவு குறைவாக இருக்க வாய்ப்புள்ளது. ஒரு பெரிய மருத்துவ அவசரத்தின் போது, இந்த தொகை போதுமானதாக இருக்காது. பல நேரங்களில், நவீன சிகிச்சை முறைகள் (Modern Treatments) இதில் கவரேஜ் செய்யப்படாமல் போகலாம்.

ஏன் தனிப்பட்ட இன்சூரன்ஸ் அவசியம்?

தனிப்பட்ட பாலிசி (Individual Health Policy) உங்களின் சொத்து. நீங்கள் வேலை மாறினாலும், ஊர் மாறினாலும், வேலையே இல்லாமல் இருந்தாலும் இந்த பாலிசி உங்களோடு இருக்கும். இதுதான் 'போர்ட்டபிலிட்டி' (Portability) எனப்படும் மிகப்பெரிய வசதி. உங்கள் குடும்பத்தின் தேவைக்கேற்ப கவரேஜை நீங்களே தேர்வு செய்து கொள்ள முடியும் என்பதால், இது நீண்டகால நிதி பாதுகாப்பிற்கு மிகவும் முக்கியமானது.

நிபுணர்களின் அறிவுரைப்படி, நிறுவனத்தின் இன்சூரன்ஸை ஒரு சப்போர்ட்டாக மட்டும் வைத்துக்கொண்டு, உங்களின் பிரைமரி பாதுகாப்பிற்கு என்று தனியாக ஒரு இன்சூரன்ஸ் பாலிசியை வைத்துக்கொள்வதே சிறந்தது.