ரக்ஷா பந்தன் வெறும் பண்டிகை மட்டுமல்ல, குடும்ப சொத்து பரிமாற்றம் மற்றும் எதிர்கால திட்டமிடல் குறித்து சகோதர, சகோதரிகள் மனம் திறந்து பேச இதுவே சரியான நேரம். முறையான திட்டமிடல் சொத்துக்களைப் பாதுகாப்பதோடு, வருங்கால சட்ட சிக்கல்களையும் தவிர்க்க உதவும்.
நிதித் திட்டமிடல் என்பது பெரும்பாலும் தனிநபர் வளர்ச்சியை மட்டுமே மையமாகக் கொண்டுள்ளது. ஆனால், தனிநபர் செல்வத்திற்கு மிகப்பெரிய அச்சுறுத்தலாக இருப்பது குடும்ப வாரிசுரிமை (Family Succession) தொடர்பான சிக்கல்கள்தான். பாதுகாப்பிற்கான உறுதிமொழியை வழங்கும் ரக்ஷா பந்தன் பண்டிகை, குடும்ப சொத்துக்களைப் பாதுகாப்பாக அடுத்த தலைமுறைக்குக் கொண்டு செல்ல விவாதிக்க ஒரு சிறந்த வாய்ப்பாகும்.
சொத்துரிமையை ஒரு 'Governance' ஆகக் கருதுங்கள்
முதலீட்டாளர்கள் தங்கள் போர்ட்ஃபோலியோவை எப்படி அவ்வப்போது ஆய்வு செய்கிறார்களோ, அதேபோல குடும்ப சொத்துக்களையும் நிர்வகிக்க வேண்டும். ரியல் எஸ்டேட், தங்கம் மற்றும் நிதி முதலீடுகளை எப்படிப் பிரிக்க வேண்டும் என்பதில் பல குடும்பங்கள் வெறும் வாய்மொழி ஒப்பந்தங்களை மட்டுமே நம்பியிருக்கிறார்கள். இதுவே பின்னாளில் குடும்பங்களுக்குள் பெரிய சட்டப் போராட்டங்களுக்கு வழிவகுக்கிறது. இதை ஒரு தனிப்பட்ட விஷயமாகப் பார்க்காமல், முறையாக நிர்வகிக்கப்படும் ஒரு வணிகமாகப் பார்த்தால் மட்டுமே தெளிவான திட்டமிடல் சாத்தியமாகும்.
முழுமையான சொத்து விவரப் பட்டியல் (Asset Mapping)
முறையான சொத்து மேலாண்மைக்கு, உங்கள் குடும்பத்தின் சொத்து மற்றும் கடன் விவரங்கள் வெளிப்படையாக இருக்க வேண்டும். வெறும் நிலங்கள் மற்றும் வீடுகள் மட்டுமல்லாமல், டிமேட் அக்கவுண்ட் (Demat accounts), பிபிஎஃப் (PPF), வெளிநாட்டு முதலீடுகள் மற்றும் இன்சூரன்ஸ் பாலிசிகளைப் பட்டியலிட வேண்டும். அதேபோல, பிசினஸ் கடன்கள், பர்சனல் லோன் மற்றும் நிலுவையில் உள்ள வரிச் சிக்கல்களை முன்கூட்டியே கண்டறிவது, சொத்து கைமாறும் போது ஏற்படும் நிதி அதிர்ச்சிகளைத் தவிர்க்க உதவும்.
உயில் (Will) மூலம் தெளிவுபடுத்துதல்
குடும்பச் சொத்துக்களைப் பாதிக்கும் மிகப்பெரிய ஆபத்து, பெற்றோரின் விருப்பங்கள் முறையாக ஆவணப்படுத்தப்படாததுதான். 'நீங்களே பார்த்துப் பிரித்துக் கொள்ளுங்கள்' என்று வாய்மொழியாகச் சொல்வது குழப்பத்தையே தரும். பெற்றோர்கள் உயிருடன் இருக்கும்போதே, அவர்களின் விருப்பத்தை ஒரு 'உயில்' (Will) மூலம் தெளிவாகப் பதிவு செய்ய ஊக்கப்படுத்துங்கள். இது வாரிசுகளுக்கு இடையே தேவையற்ற மனக்கசப்புகளைக் குறைக்கும்.
நிர்வாகத் தயார்நிலை (Administrative Readiness)
சொத்துக்களைப் பாதுகாப்பாக மாற்ற, ஆவணங்கள் தெளிவாக இருக்க வேண்டும். வீட்டின் ஒரிஜினல் பத்திரங்கள், வரி ஆவணங்கள் மற்றும் வங்கி விவரங்களை ஒரே இடத்தில் பாதுகாப்பாக வைக்கும் முறையை உருவாக்குங்கள். ஒரு சொத்துக்கான 'எக்ஸிகியூட்டரை' (Executor) நியமிப்பது, சொத்து பரிமாற்றத்தை நடுநிலையாகவும் சுமூகமாகவும் மாற்றும். ஆவணங்களை அவ்வப்போது புதுப்பிப்பதன் மூலம் உங்கள் குடும்பத்தின் நிதிச் செல்வத்தைப் பல தலைமுறைகளுக்குப் பாதுகாக்க முடியும்.