Public Provident Fund (PPF) கணக்கு 15 வருடங்களில் முதிர்ச்சியடையும் (Maturity). ஆனால், அதை உடனே க்ளோஸ் செய்ய வேண்டிய அவசியமில்லை. பணத்தை முழுமையாக எடுப்பது, முதலீட்டைத் தொடர்வது அல்லது காலத்தை நீட்டிப்பது என முதலீட்டாளர்களுக்கு 3 சிறந்த ஆப்ஷன்கள் உள்ளன.
15 வருடங்கள் கழித்து PPF முதிர்ச்சியடைந்த பிறகு, உங்கள் பணத்தை என்ன செய்வது என்பது குறித்த தெளிவான திட்டமிடல் அவசியம். அரசு வழங்கும் அந்த 3 ஆப்ஷன்களைப் பார்ப்போம்.
1. முழுமையாக பணத்தை எடுத்தல் (Full Withdrawal)
கணக்கை மூடிவிட்டு, அசல் மற்றும் வட்டி என மொத்தத் தொகையையும் உங்கள் வங்கி கணக்கிற்கு மாற்றிக்கொள்ளலாம். குழந்தைகளின் கல்வி, வீட்டு உபயோகம் அல்லது கடன் அடைக்கத் தேவைப்படுபவர்களுக்கு இந்த முறை ஏற்றது.
2. புதிய முதலீடு இல்லாமல் வட்டி பெறுதல்
பணத்தை உடனடியாக எடுக்கத் தேவையில்லை என்றால், கணக்கை க்ளோஸ் செய்யாமல் அப்படியே விடலாம். இதற்குப் புதிய டெபாசிட் எதுவும் செய்யத் தேவையில்லை. ஆனால், இருக்கும் தொகைக்கு அரசு நிர்ணயிக்கும் வட்டி (தற்போது 7.1%) தொடர்ந்து கிடைக்கும். இதில் ஆண்டுக்கு ஒருமுறை பணம் எடுக்கும் வசதியும் உண்டு.
3. காலத்தை நீட்டித்தல் (Extension with Contributions)
நீண்ட கால சொத்து உருவாக்கத்தில் ஆர்வம் உள்ளவர்கள், PPF கணக்கை தலா 5 ஆண்டுகள் என்ற அடிப்படையில் நீட்டித்துக் கொள்ளலாம். இதற்கு Form 4 படிவத்தை முதிர்ச்சி அடைந்த ஒரு வருடத்திற்குள் சமர்ப்பிக்க வேண்டும். இதைச் செய்வதன் மூலம் பழையபடி ஆண்டுதோறும் புதிய தொகையைச் சேமிக்க முடியும்.
கவனிக்க வேண்டிய ரிஸ்க்குகள்
PPF பாதுகாப்பானது என்றாலும், வட்டி விகிதம் நிலையானது அல்ல. நிதி அமைச்சகம் ஒவ்வொரு காலாண்டும் வட்டி விகிதத்தை ஆய்வு செய்து மாற்றும் என்பதை கவனத்தில் கொள்க. மேலும், பணவீக்கத்தை விட அதிக லாபம் தரும் ஈக்விட்டி திட்டங்களை ஒப்பிடும்போது, PPF-ன் வருமானம் குறைவாக இருக்கலாம். எனவே, உங்கள் நிதி இலக்கிற்கு ஏற்ப முடிவெடுப்பது புத்திசாலித்தனம்.