NPS சந்தாதாரர்கள் தங்கள் ஓய்வுக்கால பணத்தை பெறுவதற்கு PFRDA இரண்டு புதிய வசதிகளை அறிமுகப்படுத்தியுள்ளது. SLW மூலம் நிலையான வருமானமும், SUR மூலம் மார்க்கெட் ஏற்ற இறக்கத்திற்கு ஏற்ப யூனிட்டுகளை பாதுகாக்கும் வாய்ப்பும் கிடைக்கிறது.
ஓய்வுக்காலத்திற்குப் பிறகு NPS முதலீட்டாளர்கள் தங்கள் நிதியை எவ்வாறு பெறுவது என்பதில் குழப்பம் ஏற்படலாம். இதற்காக PFRDA தற்போது இரண்டு முக்கிய வழிகளை வழங்கியுள்ளது. அவை என்னவென்பதை விரிவாகப் பார்ப்போம்.
Systematic Lump Sum Withdrawal (SLW)
இது ஒரு குறிப்பிட்ட தொகையைத் தொடர்ந்து பெற விரும்புபவர்களுக்கானது. இதில் நீங்கள் ஒரு குறிப்பிட்ட தொகையைத் தேர்வு செய்தால், அந்தத் தொகைக்கு இணையாக யூனிட்டுகள் விற்கப்பட்டு உங்கள் கைக்கு வரும். இது உங்கள் அன்றாட செலவுகளைத் திட்டமிட உதவும். ஆனால், மார்க்கெட் மந்தமாக இருக்கும்போது, அதே தொகையை எடுக்க அதிக யூனிட்டுகளை விற்க வேண்டியிருக்கும். இதனால் உங்கள் மொத்த முதலீடு (Corpus) வேகமாக குறைய வாய்ப்புள்ளது.
Systematic Unit Redemption (SUR)
இதில் நீங்கள் பணத்திற்குப் பதில் ஒரு குறிப்பிட்ட 'யூனிட்டுகளை' விற்பனை செய்யத் தேர்வு செய்கிறீர்கள். மார்க்கெட் நன்றாக இருந்தால் அதிக லாபமும், மார்க்கெட் குறைந்தால் குறைவான வருமானமும் கிடைக்கும். இதில் உங்கள் கையிருப்பு யூனிட்டுகள் வீணாக விற்கப்படாது என்பதுதான் இதன் மிகப்பெரிய பலம். ஆனால், மாத வருமானம் மாறிக் கொண்டே இருக்கும் என்பது இதில் உள்ள சவால்.
தகுதிகள் மற்றும் விதிகள்
அரசு சாரா சந்தாதாரர்களுக்கு, மொத்த கார்பஸ் ₹12 லட்சம் மேல் இருந்தால், 80% வரை திரும்பப் பெறலாம். மீதமுள்ள தொகைக்கு ஆனுவிட்டி (Annuity) வாங்க வேண்டும். ஒருவேளை மொத்த கார்பஸ் ₹8 லட்சம் அல்லது அதற்கு குறைவாக இருந்தால், முழுமையாக 100% பணத்தை எடுத்துக்கொள்ளலாம்.
நீங்கள் உங்கள் அடிப்படைத் தேவைகளுக்கு நிலையான வருமானத்தை எதிர்பார்க்கிறீர்கள் என்றால் SLW சிறந்தது. ஆனால், மற்ற வருமான ஆதாரங்கள் உங்களுக்கு இருந்தால், நீண்ட காலத்திற்கு உங்கள் கார்பஸை பாதுகாக்க SUR முறையைத் தேர்வு செய்வது புத்திசாலித்தனம்.