ஒருவர் வீட்டுக் கடனுக்கு இணை வாங்கியவராக இருந்து, அவர் எதிர்பாராதவிதமாக இறந்துவிட்டால், கடனை முழுமையாக அடைக்கும் பொறுப்பு மீதமுள்ளவருக்கு வந்துவிடும். வங்கி தானாக கடனை ரத்து செய்யாது, EMI-யையும் நிறுத்தாது. குடும்பத்தினர் இது குறித்து வங்கிக்கு தெரிவித்து, கடன் காப்பீடு (Loan Insurance) உள்ளதா என சரிபார்ப்பது மிக முக்கியம்.
இணை வாங்கியவர் மரணமடைந்தால் என்ன ஆகும்?
வீட்டுக் கடனுக்கு இருவர் இணை வாங்கியவராக (Co-borrower) இருந்து, அவர்களில் ஒருவர் இறந்துவிட்டால், அந்த கடன் முழுமையாக முடிந்துவிட்டதாகவோ அல்லது பாதியாக குறைக்கப்பட்டுவிட்டதாகவோ பலர் தவறாக நினைக்கிறார்கள். ஆனால், உண்மையில், சட்டப்படி முழு கடனையும் செலுத்தும் பொறுப்பு மீதமுள்ள இணை வாங்கியவருக்கே சேரும்.
வங்கிகளுடனான ஒப்பந்தங்களில், இருவர் கையெழுத்திட்டிருந்தால், ஒருவர் கடனை அடைக்கத் தவறினால், மற்றொருவர் முழு கடனுக்கும் பொறுப்பாவார்கள். எனவே, கடன் வாங்கியவர் இறந்தாலும், வங்கி EMI-யை நிறுத்தாது.
சட்ட சிக்கல்கள் வருமா?
இணை வாங்கியவர் இறந்துவிட்டதால், வங்கி கடனை சரிசெய்யும் என நினைத்து, மீதமுள்ளவர் EMI செலுத்துவதை நிறுத்தினால், அது கடன் தவணையை செலுத்தாத நிலை (Default) ஆகிவிடும். இதனால், கடன் வாங்கியவரின் கிரெடிட் ஸ்கோர் பாதிக்கப்படும். நிலைமை மோசமானால், SARFAESI சட்டத்தின் கீழ், வங்கி அடமானம் வைத்த சொத்தை கையகப்படுத்தவும் வாய்ப்புள்ளது.
கடன் காப்பீடு (Loan Insurance) உண்டா?
வீட்டுக் கடன் வாங்கும்போதே, அதனுடன் இணைந்த ஆயுள் காப்பீடு (Credit-linked Life Insurance) எடுக்கப்பட்டுள்ளதா என்பதை குடும்பத்தினர் சரிபார்க்க வேண்டும். அப்படி ஒரு பாலிசி இருந்தால், அதன் விதிமுறைகளின்படி, இறந்தவரின் கடன் தொகையை அந்தக் காப்பீடு மூலம் முழுமையாகவோ அல்லது பகுதியாகவோ அடைக்க முடியும்.
ஆனால், இது தானாக நடக்காது. காப்பீட்டு நிறுவனத்திடம் முறைப்படி க்ளைம் (Claim) செய்து, தேவையான ஆவணங்களை சமர்ப்பிக்க வேண்டும். கடன் ஒப்பந்த ஆவணங்களில் இதுபற்றி தெளிவாக இருக்கும். உடனடியாக இதைச் செய்வதன் மூலம், கடன் சுமையைக் குறைக்கலாம்.
சொத்துரிமையில் சிக்கல்?
இறந்தவர், வீட்டின் இணை உரிமையாளராகவும் (Co-owner) இருந்தால், நிலைமை இன்னும் சிக்கலாகும். அவரது வீட்டுப் பங்கு, சட்டப்படி அவரது வாரிசுகளுக்கோ அல்லது அவர் எழுதி வைத்த உயில்படியோ (Will) செல்லும். இதனால், கடன் முழுவதையும் மீதமுள்ளவர் செலுத்த வேண்டியிருந்தாலும், வீட்டின் முழு உரிமை அவருக்கே வராமல் போகலாம். எனவே, சொத்துரிமை விவரங்களையும் சரிசெய்வது அவசியம்.
என்ன செய்ய வேண்டும்?
இப்படிப்பட்ட சூழலில், உடனடியாக வங்கி நிர்வாகத்தைத் தொடர்புகொண்டு நிலைமையை விளக்குவதே சிறந்த வழி. கடன் நிலவரம், காப்பீடு பற்றிய விவரங்கள், மற்றும் நிதிச் சிரமங்கள் குறித்து அவர்களிடம் பேசி, சரியான ஆலோசனைகளைப் பெறலாம். சரியான நேரத்தில் வங்கிக்கு தகவல் கொடுத்து, தேவையான ஆவணங்களைச் சமர்ப்பிப்பது, எதிர்காலத்தில் வரக்கூடிய சட்ட மற்றும் நிதிப் பிரச்சனைகளைத் தவிர்க்க உதவும்.