Bank, Demat மற்றும் Mutual Fund என அனைத்து கணக்குகளுக்கும் ஒரே நபரை நாமினியாக போடுவது வசதியாக இருக்கலாம், ஆனால் அது குடும்பத்தினருக்கு பெரிய சட்ட சிக்கல்களை உருவாக்கலாம். நாமினி என்பவர் வாரிசு அல்ல, ஒரு பாதுகாவலர் என்பதை முதலீட்டாளர்கள் புரிந்துகொள்ள வேண்டும். உங்கள் சொத்துக்கள் சரியாகப் பகிரப்பட, நாமினேஷனை உங்கள் உயிலுடன் (Will) ஒப்பிட்டுச் சரிபார்ப்பது மிகவும் அவசியம்.
பல முதலீட்டாளர்கள் வங்கி, டிமேட் அல்லது மியூச்சுவல் ஃபண்ட் கணக்குகளைத் தொடங்கும்போது, அனைத்திற்கும் ஒரே நபரை நாமினியாக நியமித்து வேலையை எளிதாக்க நினைக்கிறார்கள். இது ஆரம்பத்தில் எளிமையாகத் தெரிந்தாலும், எதிர்பாராத நேரத்தில் குடும்ப உறுப்பினர்களுக்குப் பெரும் தலைவலியை உண்டாக்கும்.
நாமினி vs சட்டபூர்வ வாரிசு
முதலீட்டாளர்கள் முதலில் புரிந்துகொள்ள வேண்டியது: நாமினிக்கும், சட்டபூர்வ வாரிசுக்கும் (Legal Heir) பெரிய வித்தியாசம் உள்ளது. SEBI விதிமுறைகளின்படி, நாமினி என்பவர் சொத்தைப் பெற்றுப் பாதுகாக்கும் ஒரு பாதுகாவலர் மட்டுமே. சட்டப்படி அல்லது உயிலின்படி உண்மையான வாரிசுகளிடம் அந்தச் சொத்தைச் சேர்ப்பதுதான் இவர்களது கடமை.
நாமினியாக ஒருவர் இருக்கிறார் என்பதற்காக, அவர் அந்தச் சொத்தின் உரிமையாளர் ஆகிவிட முடியாது. உதாரணமாக, ஒரு முதலீட்டாளர் தன் மனைவியை நாமினியாகப் போட்டுவிட்டு, உயிலில் சொத்தை மற்ற வாரிசுகளுக்குப் பிரித்து கொடுத்திருந்தால், அங்கே உயிலின் (Will) முடிவே இறுதியானது. நாமினேஷன் மற்றும் உயில் முரண்படும்போது, நீதிமன்றச் சிக்கல்கள் மற்றும் சொத்து கைமாற தாமதம் ஏற்படுவது உறுதி.
ஒரே நாமினியைத் தேர்ந்தெடுப்பதில் உள்ள ஆபத்துகள்
ஒவ்வொரு சொத்திற்கும் ஒவ்வொரு நோக்கம் இருக்கும். உதாரணத்திற்கு, அன்றாடச் செலவுகளுக்காகப் பேங்க் அக்கவுண்ட்டில் மனைவியின் பெயரை நாமினியாகப் போடலாம். ஆனால், குழந்தையின் கல்வி அல்லது பெற்றோரின் பராமரிப்பிற்காகச் சேமிக்கப்பட்ட நீண்டகால முதலீடுகளுக்குப் பொருத்தமான நபரை நாமினியாக நியமிக்க வேண்டும். எல்லாவற்றிற்கும் ஒரே நபரை நியமிப்பது, உங்கள் நிதி இலக்குகளையே சிதைக்கக்கூடும்.
மேலும், 25 வயதில் நியமித்த நாமினி, 45 வயதிற்குப் பிறகு அந்தப் பொறுப்பிற்குச் சரியானவரா என்பதை யாரும் பரிசீலிப்பதில்லை. திருமணம், விவாகரத்து அல்லது குடும்பத்தில் நடக்கும் மாற்றங்களுக்குப் பிறகு நாமினேஷனை அப்டேட் செய்யத் தவறுவது பெரிய தவறு.
செய்ய வேண்டியவை என்ன?
நாமினேஷன் என்பது ஒருமுறை செய்துவிட்டு மறக்கும் வேலை அல்ல. இது உங்கள் நிதித் திட்டத்தின் ஒரு பகுதி.
- தனிப்பட்ட கவனிப்பு: ஒவ்வொரு சொத்திற்கும் தனித்தனியாக யோசித்து நாமினியை நியமிக்கவும்.
- வழக்கமான ஆடிட்: குடும்பச் சூழ்நிலைகள் மாறும்போது, நாமினேஷன் விவரங்களைச் சரிபார்த்து அப்டேட் செய்யவும்.
- உயில் முக்கியம்: நாமினேஷன் என்பது உயிலுக்குப் பதிலானது அல்ல. ஒரு தெளிவான உயில் (Will) இருந்தால் மட்டுமே உங்கள் சொத்துக்கள் உங்கள் விருப்பப்படி உங்கள் வாரிசுகளைச் சென்றடைவதை உறுதி செய்ய முடியும்.