EPFO தனது போர்ட்டல் மூலம் தவறாக இணைக்கப்பட்ட Member ID-களை (MIDs) நீக்கும் வசதியை வழங்குகிறது. ஆனால், இந்த செயல்முறையைச் செய்வதற்கு முன்பு கவனமாக இருக்க வேண்டும், ஏனெனில் நீக்கப்படும் கணக்கில் உள்ள அனைத்து பணமும் நிரந்தரமாக இழக்க நேரிடும்.
EPFO தனது உறுப்பினர்களுக்கு Universal Account Number (UAN)-உடன் இணைக்கப்பட்ட வேலைவாய்ப்பு விவரங்களை நிர்வகிக்கவும், திருத்தவும் ஆன்லைன் வசதியை வழங்குகிறது. பழைய முதலாளிகளின் தவறான தரவுப் பதிவுகள் அல்லது டூப்ளிகேட் கணக்குகளால் ஏற்படும் Member ID (MID) குளறுபடிகள், பிஎஃப் பணத்தை எடுக்கும்போதோ அல்லது மாற்றும்போதோ பெரும் சிக்கல்களை உருவாக்கும். இதைச் சரிசெய்ய EPFO-வின் அதிகாரப்பூர்வ 'Unified Member Portal'-ஐப் பயன்படுத்தலாம்.
நீக்கும் முறை (Removal Process)
உறுப்பினர்கள் தங்கள் UAN மற்றும் பாஸ்வேர்டு மூலம் லாகின் செய்து, 'View' அல்லது 'Service History' பகுதிக்குச் செல்ல வேண்டும். ஆதார் கார்டுடன் இணைக்கப்பட்ட மொபைல் எண்ணிற்கு வரும் OTP மூலம் அடையாளத்தை உறுதி செய்த பிறகு, UAN-உடன் இணைக்கப்பட்டுள்ள அனைத்து MID-களும் திரையில் தோன்றும். அதில் தவறான கணக்கைத் தேர்ந்தெடுத்து நீக்கக் கோரிக்கை வைக்கலாம். இறுதிச் சமர்ப்பிப்பின் போது மீண்டும் ஒருமுறை ஆதார் OTP சரிபார்ப்பு தேவைப்படும்.
கவனிக்க வேண்டிய அபாயங்கள் (Critical Risks)
இந்தச் செயல்முறை திரும்பப் பெற முடியாத ஒன்று. ஒருமுறை நீங்கள் MID-ஐ நீக்கிவிட்டால், அந்த ஐடியுடன் தொடர்புடைய அனைத்து பணம், வட்டி மற்றும் சேவை விவரங்கள் நிரந்தரமாக நீக்கப்பட்டுவிடும். எனவே, அதில் ஏதேனும் சிறிய தொகை இருந்தாலும், அதை நீக்குவது பெரும் நஷ்டத்தை ஏற்படுத்தும் என்பதால் கவனமாகச் செயல்பட வேண்டும்.
தகுதிகள் மற்றும் கட்டுப்பாடுகள்
அனைத்து கணக்குகளையும் ஆன்லைனில் நீக்கிவிட முடியாது. உதாரணமாக, டிசம்பர் 31, 2016-க்கு முன் பணியில் சேர்ந்த கணக்குகள் அல்லது ஏற்கனவே செட்டில் செய்யப்பட்ட, நிலுவையில் உள்ள கிளைம்கள் கொண்ட கணக்குகளை நீக்க முடியாது. அதேபோல், 6 முறைக்கு மேல் பங்களிப்பு (Contributions) செய்யப்பட்ட கணக்குகளுக்கும் இந்த வசதி பொருந்தாது.
மேலும், முதலாளி ஏற்கனவே ECR (Electronic Challan-cum-Return) தாக்கல் செய்திருந்தால், கணக்கை நீக்குவதில் சிக்கல் ஏற்படலாம். இத்தகைய சூழலில், நீங்கள் EPFO அலுவலகத்தை அணுகி, வேலைவாய்ப்புக்கான ஆதாரங்களை (Appointment Letter, Salary Slips) சமர்ப்பித்து மேனுவலாகத் திருத்த வேண்டியிருக்கும்.