கார் லோன் EMI கட்டத் தவறினால், வங்கிகள் காரைப் பறிமுதல் செய்ய உரிமை உண்டு. ஆனால், அதற்கு RBI விதித்த கடுமையான விதிகளை வங்கிகள் பின்பற்ற வேண்டும். மிரட்டல் அல்லது அடியாட்களைப் பயன்படுத்துவது சட்டப்படி குற்றமாகும்.
கார் லோன் EMI-ஐத் தொடர்ந்து செலுத்தத் தவறினால், அந்த கார் பிணையமாக (Collateral) இருப்பதால், அதைத் திரும்பப் பெறும் உரிமை வங்கிகளுக்கு உண்டு. ஆனால், இந்த மீட்பு நடவடிக்கையை வங்கிகள் தங்கள் விருப்பப்படி செய்ய முடியாது. Reserve Bank of India (RBI) வகுத்துள்ள கடுமையான விதிகளின்படி மட்டுமே செயல்பட வேண்டும்.
வாகனத்தை மீட்கும் சட்டப்பூர்வ முறை
எந்தவொரு நடவடிக்கையும் எடுப்பதற்கு முன்னதாக, கடன் வாங்கியவருக்கு முறையாக நோட்டீஸ் அனுப்ப வேண்டும். நிலுவைத் தொகையைச் செலுத்த குறிப்பிட்ட கால அவகாசத்தை (Grace Period) வங்கிகள் வழங்க வேண்டும். முன்னறிவிப்பு இல்லாமல் திடீரென வந்து காரை எடுத்துச் செல்வது சட்டத்திற்குப் புறம்பானது. முறையான செயல்முறை மூலம் மட்டுமே இந்த மீட்பு நடவடிக்கை நடைபெற வேண்டும்.
அராஜகங்களுக்கு இடமில்லை!
பலரும் வங்கிகள் அடியாட்களை வைத்து காரைப் பறிமுதல் செய்யும் என்று பயப்படுவார்கள். இது முற்றிலும் தவறு. RBI விதிமுறைகள் மற்றும் உச்ச நீதிமன்ற உத்தரவுகளின்படி, மீட்பு முகவர்கள் (Recovery Agents) மிரட்டுவதோ, பொது இடத்தில் அவமானப்படுத்துவதோ, உடல் ரீதியாகத் துன்புறுத்துவதோ கூடாது. மீறினால், வங்கி மீது நீங்கள் புகாரளிக்கலாம். உங்கள் புகாரை வங்கியின் குறைகேட்பு பிரிவில் பதிவு செய்து, தீர்வு கிடைக்காத பட்சத்தில் RBI Ombudsman-ஐ அணுகலாம்.
கார் பறிமுதல் செய்யப்பட்டால் கடன் முடிந்துவிடுமா?
இது பலருக்கு இருக்கும் ஒரு தவறான நம்பிக்கை. காரை வங்கியிடம் ஒப்படைத்தாலும், உங்கள் கடன் பாக்கி முழுமையாக நீங்காது. வங்கி காரை விற்று அந்தப் பணத்தை லோன் பாக்கியுடன் ஈடுகட்டும். விற்கப்பட்ட தொகை, உங்கள் லோன் பாக்கியை விட குறைவாக இருந்தால், அந்த மீதமுள்ள தொகையை நீங்கள் கட்டாயம் செலுத்த வேண்டும் (Deficiency Claim). எனவே, பிரச்சனையைத் தவிர்ப்பதை விட, வங்கி அதிகாரிகளுடன் பேசி Loan Restructuring அல்லது தற்காலிகமாக EMI-க்கு விடுமுறை கேட்பதே புத்திசாலித்தனமான அணுகுமுறையாகும்.