Anant Ladha: முதல் ஒரு கோடியை எட்ட 'Active Income' தான் சாவி! முதலீட்டாளர்களுக்கு செம டிப்ஸ்

Business Standard BFSI Insight Summit 2026-ல் நிதி ஆலோசகர் Anant Ladha முதலீட்டாளர்களுக்கு ஒரு முக்கிய உண்மையை உடைத்துச் சொல்லியுள்ளார். பலரும் சரியான பங்கை (Stock) அல்லது மியூச்சுவல் ஃபண்டைத் தேர்ந்தெடுப்பதிலேயே குறியாக இருக்கிறார்கள். ஆனால், செல்வத்தை உருவாக்குவதில் உங்கள் தனிப்பட்ட வருமானத் திறனும் (Earning Power), செலவுகளைக் கட்டுப்படுத்துவதுமே மிக முக்கியமான பங்கு வகிக்கிறது.

வருமானமே பிரதானம்

மார்க்கெட் லாபம் என்பது இரண்டாம் பட்சம்தான். ஒரு முதலீட்டாளருக்குத் தொடக்க காலத்தில் கைகொடுப்பது உங்கள் வேலை, திறன் அல்லது தொழில் மூலம் கிடைக்கும் 'Active Income' தான். உங்களையே ஒரு மிகப்பெரிய சொத்தாகக் கருதி, திறன்களை வளர்த்துக்கொள்வதன் மூலம் வருமானத்தை அதிகரியுங்கள். அப்போதுதான் முதலீடு செய்வதற்குத் தேவையான அதிகப்படியான பணம் உங்கள் கைக்கு வரும்.

லைஃப்ஸ்டைல் பணவீக்கம் (Lifestyle Inflation)

பொருளாதாரப் பணவீக்கம் 6% அளவில் இருந்தாலும், இன்றைய இளைஞர்களின் வாழ்க்கை முறைக்கான செலவுகள் 15% முதல் 20% வரை உயர்ந்துள்ளது. வருமானத்தை விட செலவு வேகமாக வளர்ந்தால், சேமிப்பு என்பது எட்டாக்கனியாகிவிடும். நீண்ட காலச் சொத்துக்களை உருவாக்குவதற்குப் பதிலாக, ஆடம்பரத் தேவைகளில் பணத்தை வீணடிப்பதை முதலீட்டாளர்கள் தவிர்க்க வேண்டும்.

கடன் வலையில் விழாதீர்கள்

தேவையற்ற பொருள்களுக்காக EMI-ல் கடன் வாங்குவது பெரிய தவறு. குறிப்பாக, தனது முதலீடுகளை அடமானம் வைத்து அன்றாடச் செலவுகளுக்குக் கடன் வாங்குவதை அடியோடு தவிர்க்க வேண்டும். இது உங்கள் போர்ட்ஃபோலியோவின் கூட்டு வட்டி (Compounding) பலத்தைக் குலைத்துவிடும்.

மார்க்கெட் ஏற்ற இறக்கம்

சந்தையின் தற்காலிக உணர்ச்சிகளுக்கு அடிமையாகாமல் தரவுகளை (Data) நம்புங்கள். சந்தை எப்போதும் சுழற்சி முறையில் தான் இயங்கும். பங்குச் சந்தை அழுத்தத்தில் இருக்கும்போது, பிக்சட் டெபாசிட் (FD) போன்ற நிலையான சொத்துக்கள் உங்களுக்குக் கைகொடுக்கும். சர்வதேச சந்தையிலும் முதலீடு செய்து, ரிஸ்க்கைக் குறைத்து பொறுமையாக முதலீடு செய்பவர்களே நீண்ட காலத்தில் கோடீஸ்வரர்களாக முடியும்.