மாணவர் சேர்ந்த பிறகு, பாதியில் கல்விக் கட்டணத்தை உயர்த்த தனியார் தொழில்முறை கல்லூரிகளுக்கு உச்ச நீதிமன்றம் அதிரடி தடை விதித்துள்ளது. அட்மிஷன் நேரத்திலேயே மொத்த கட்டணத்தையும் தெளிவுபடுத்த வேண்டும் என உத்தரவிடப்பட்டுள்ளது.
இந்திய உச்ச நீதிமன்றம் வழங்கியுள்ள இந்த வரலாற்றுச் சிறப்புமிக்க தீர்ப்பு, தனியார் இன்ஜினியரிங் மற்றும் மருத்துவக் கல்லூரிகளுக்குப் பெரும் கட்டுப்பாடு விதித்துள்ளது. நீதிபதிகள் PS நரசிம்மா மற்றும் அலோக் ஆராதே தலைமையிலான அமர்வு, ஒரு மாணவர் சேர்ந்த பிறகு, படிப்பின் இடைக்காலத்தில் கல்விக் கட்டணத்தை உயர்த்தக் கூடாது எனத் தீர்ப்பளித்துள்ளது.
தீர்ப்பிற்கான பின்னணி
மேற்கு வங்காளத்தில் உள்ள Dr. BC Roy Engineering College விவகாரம் தான் இந்த வழக்கிற்கு முக்கிய காரணம். அந்தக் கல்லூரி, 2023-27 பேட்ச் மாணவர்களுக்கு திடீரென 37% கட்டண உயர்வை அறிவித்ததோடு, புதிய வளர்ச்சி கட்டணங்களையும் (Development fees) வசூலித்தது. இதை எதிர்த்துத் தொடரப்பட்ட வழக்கில், இத்தகைய தன்னிச்சையான கட்டண உயர்வுகள் நடுத்தரக் குடும்பங்களின் நிதித் திட்டமிடலைச் சிதைப்பதாக நீதிமன்றம் சுட்டிக்காட்டியது.
இனி கல்லூரிகளின் நிலை என்ன?
இந்தத் தீர்ப்பின் மூலம், இனி கல்லூரிகள் தங்களின் செலவுகளை ஈடுகட்ட மாணவர்களிடம் பாதியில் கட்டணத்தை உயர்த்த முடியாது. மாணவர் சேரும்போதே முழுமையான கட்டண விவரங்கள் வெளிப்படையாகத் தெரிவிக்கப்பட வேண்டும். National Education Policy 2020 மற்றும் AICTE வழிகாட்டுதல்களின்படி, கட்டண முறை முன்கூட்டியே கணிக்கக்கூடியதாக (Predictable) இருக்க வேண்டும் என அறிவுறுத்தப்பட்டுள்ளது.
மிகவும் அசாதாரணமான சூழ்நிலைகளில் மட்டுமே கட்டண மாற்றம் அனுமதிக்கப்படும், ஆனால் அதற்கு முறையான காரணங்களை விளக்க வேண்டிய கட்டாயத்தை நீதிமன்றம் உருவாக்கியுள்ளது. இது இனிவரும் காலங்களில் தனியார் கல்வி நிறுவனங்கள் நிதி நிர்வாகத்தில் அதிக வெளிப்படைத்தன்மையுடன் செயல்பட வழிவகுக்கும்.