Maharashtra Public Service Commission (MPSC) நடத்திய Drug Inspector தேர்வு, வினாத்தாள் கசிவு காரணமாக ரத்து செய்யப்பட்டுள்ளது. மும்பை கிரைம் பிராஞ்ச் விசாரணையில் முக்கிய அதிகாரிகள் உட்பட 6 பேர் கைது செய்யப்பட்டுள்ளனர்.
மகாராஷ்டிரா அரசு நடத்தும் Drug Inspector பணியிடங்களுக்கான தேர்வு, முறைகேடுகள் காரணமாக அதிகாரப்பூர்வமாக ரத்து செய்யப்பட்டுள்ளது. மும்பை குற்றப்பிரிவு போலீசார் மேற்கொண்ட அதிரடி விசாரணையில், 294 ரகசிய வினாக்கள் தேர்வு நடப்பதற்கு முன்பே கசியவிடப்பட்டது உறுதி செய்யப்பட்டுள்ளது.
கைதான முக்கிய நபர்கள்
இந்த ஊழலில் கமிஷனின் கூடுதல் செயலாளர் Abhijit Lendwe உட்பட மூன்று அரசு ஊழியர்கள் சிக்கியுள்ளனர். இது தவிர, கோச்சிங் சென்டர் நடத்துபவர்கள் சிலரும் கைது செய்யப்பட்டுள்ளனர். ஒரு கேள்வித்தாளை விற்பனை செய்ய சுமார் ₹5 லட்சம் வரை லஞ்சம் பெறப்பட்டதாக போலீஸ் விசாரணையில் தெரியவந்துள்ளது.
தேர்வர்களுக்கான முக்கிய அறிவிப்பு
இந்த தேர்வு ஏற்கனவே நேர்காணல் (Interview) கட்டத்தை எட்டியிருந்தது. சுமார் 488 பேர் நேர்காணலில் கலந்துகொண்ட நிலையில், தேர்வு ரத்து செய்யப்பட்டுள்ளது ஆயிரக்கணக்கான தேர்வர்களுக்கு பெரும் ஏமாற்றத்தை அளித்துள்ளது. இருப்பினும், தேர்வர்கள் மீண்டும் கட்டணம் செலுத்தவோ அல்லது புதிதாக பதிவு செய்யவோ தேவையில்லை என கமிஷன் தெரிவித்துள்ளது.
தற்போது, கைதானவர்களிடம் இருந்து கைப்பற்றப்பட்ட ஆவணங்களை ஆய்வு செய்து, இந்த மோசடியில் இன்னும் எத்தனை அதிகாரிகள் ஈடுபட்டுள்ளனர் என்பது குறித்து போலீசார் தீவிர விசாரணை நடத்தி வருகின்றனர். மறுதேர்வுக்கான கால அட்டவணை விரைவில் அறிவிக்கப்படும் என எதிர்பார்க்கப்படுகிறது.