டிசாஸ்டர் வார்னிங் இருந்தும் பயனில்லை! இந்தியர்களின் தற்பாதுகாப்பு திறன் ஏன் குறைவு?

இந்தியாவின் பேரிடர் மேலாண்மைத் திட்டத்தில் டெக்னாலஜி வளர்ந்திருந்தாலும், மக்கள் அதை எதிர்கொள்ளும் விதத்தில் பெரும் இடைவெளி இருப்பதாக புதிய ஆய்வு ஒன்று எச்சரிக்கிறது. உலக அளவில் பேரிடர் எச்சரிக்கை பெறும் விகிதம் 80% ஆக உள்ள நிலையில், இந்தியா 84% என்ற அளவில் சிறப்பாகச் செயல்படுகிறது. ஆனால், அந்த எச்சரிக்கையைத் தொடர்ந்து பாதுகாப்பான இடங்களுக்கு மாறுவதிலோ அல்லது தற்காப்பு நடவடிக்கைகளை எடுப்பதிலோ இந்தியர்களின் விகிதம் வெறும் 40% மட்டுமே. இது உலக சராசரியான 64%-ஐ விட மிகவும் குறைவு.

எச்சரிக்கை மற்றும் செயல்பாடு (Warning-Action Divide)

அரசு அனுப்பும் எச்சரிக்கைகள் மக்களைச் சென்றடைவதில் எந்தப் பிரச்சனையும் இல்லை. ஆனால், அந்த எச்சரிக்கையைத் தொடர்ந்து எப்படிச் செயல்பட வேண்டும் என்ற திட்டமிடல் (Disaster Safety Plan) இல்லாததே முக்கியப் பிரச்சினை. வெறும் 21% இந்தியக் குடும்பங்கள் மட்டுமே முறையான பேரிடர் பாதுகாப்புத் திட்டத்தை வைத்துள்ளன. ஒரு முறையான திட்டத்தை வைத்திருப்பவர்கள், ஆபத்து வரும்போது செயல்படுவதற்கு 4 மடங்கு அதிக வாய்ப்புள்ளதாக ஆய்வு தெரிவிக்கிறது.

ஏன் இந்த நிலை?

இந்திய மக்கள் அரசு அமைப்புகளின் மீது அதிக நம்பிக்கை வைத்துள்ளனர் (63%). ஆனால், இந்த அதீத நம்பிக்கை தன்னிச்சையாகச் செயல்படும் திறனைக் குறைத்துவிடுகிறது (Personal Agency). 2023-ல் இருந்து இந்தத் தற்காப்புத் திறன் 26% புள்ளிகள் சரிந்துள்ளது.

ஐக்கிய நாடுகள் சபை (United Nations) 2027-க்குள் உலகளாவிய முன்னெச்சரிக்கை அமைப்புகளை உருவாக்கத் திட்டமிட்டுள்ளது. ஆனால், வெறும் எச்சரிக்கைகளை அனுப்புவதால் மட்டும் பேரிடர் இழப்புகளைத் தடுத்துவிட முடியாது. மக்களிடம் விழிப்புணர்வை ஏற்படுத்தி, ஒவ்வொரு குடும்பமும் தங்களைப் பாதுகாத்துக்கொள்ளும் திட்டங்களை வைத்திருப்பதை உறுதி செய்வதே பொருளாதார ரீதியாக இழப்புகளைக் குறைக்க உதவும்.