2026-ம் ஆண்டிலும் இந்தியாவின் வெளிநாட்டு சுற்றுலாப் பயணிகள் வருகை **2019**-ம் ஆண்டு அளவை விட குறைவாகவே இருக்கும் என்று கணிக்கப்பட்டுள்ளது. அதிக விமானக் கட்டணம் மற்றும் விசா நடைமுறை சிக்கல்கள் இதற்கு முக்கிய காரணங்களாக பார்க்கப்படுகின்றன.
சுற்றுலாத்துறையின் மீட்புப் பணிகள் மிக மெதுவாகவே நடைபெற்று வருகின்றன. 2026-ம் ஆண்டில் வெளிநாட்டு சுற்றுலாப் பயணிகளின் எண்ணிக்கை சுமார் 8 மில்லியன் முதல் 9 மில்லியன் வரை மட்டுமே இருக்கும் என்று எதிர்பார்க்கப்படுகிறது. இது கடந்த 2025-ல் பதிவான 9.15 மில்லியன் எண்ணிக்கையை விட குறைவு என்பது குறிப்பிடத்தக்கது. மேலும், தொற்றுநோய்க்கு முந்தைய 2019-ம் ஆண்டில் பதிவான 10.9 மில்லியன் என்ற உச்சத்தை எட்டுவதில் பெரும் சவால் நீடிக்கிறது.
விமானக் கட்டண உயர்வு ஏற்படுத்திய தாக்கம்
உக்ரைன் மற்றும் ஈரான் மோதல்களால் உலக அளவில் கச்சா எண்ணெய் விலை உயர்ந்துள்ளது. இதன் விளைவாக, ஜெட் எரிபொருள் விலை அதிகரித்து, சர்வதேச விமானக் கட்டணங்கள் எகிறியுள்ளன. பட்ஜெட் பயணிகளை இது பெரிதும் பாதித்துள்ளதால், அவர்கள் இந்தியாவுக்குப் பதிலாக வேறு மலிவான நாடுகளைத் தேர்ந்தெடுக்கத் தொடங்கியுள்ளனர்.
ஹோட்டல் துறைக்கு காத்திருக்கும் நெருக்கடி
உள்நாட்டு சுற்றுலா பயணிகளின் வருகை அதிகமாக இருந்தாலும், இந்திய ஹோட்டல் நிறுவனங்கள் லாபத்தை அதிகரிக்க சர்வதேச பயணிகளையே நம்பியுள்ளன. குறிப்பாக Indian Hotels Company போன்ற முன்னணி நிறுவனங்கள், சர்வதேச பயணிகள் வருகை முழுமையாக மீளாதது, அறைக்கான வருவாயை (Revenue per room) உயர்த்துவதில் சிக்கலை ஏற்படுத்தியுள்ளதாகக் குறிப்பிடுகின்றன.
தீர்வு என்ன?
விசா நடைமுறைகளில் உள்ள சிக்கல்கள் மற்றும் போதிய விளம்பரப் பிரச்சாரம் இல்லாதது இந்தியாவின் வளர்ச்சியைத் தடுக்கிறது. குறிப்பாக சீனா போன்ற நாடுகளிலிருந்து வரும் பயணிகளுக்கான விசா கெடுபிடிகள் தளர்வு செய்யப்பட வேண்டும் என Federation of Associations in Indian Tourism and Hospitality வலியுறுத்தியுள்ளது. செப்டம்பர் மாதம் நடைபெறவுள்ள BRICS உச்சி மாநாட்டில் எடுக்கப்படும் முடிவுகள், இந்த சுற்றுலாப் பயணிகளின் எண்ணிக்கையை உயர்த்துவதற்கு ஒரு திருப்புமுனையாக அமையலாம் என்று சந்தை நிபுணர்கள் எதிர்பார்க்கின்றனர்.